გამოქვეყნებულია: 29 ივნისი, 2009 - 14:16
მიუხედავად გარკვეული წინააღმდეგობებისა, უკვე რამდენიმე წელია რაც მსოფლიოში ერთერთ უდიდეს გამოფენაზე “ვინექსპო” ერთი დღე და სპეციალური სივრცე ეთმობა ბიოდინამიური ღვინოების ელიტურ ჯგუფს, “დარუნება ტერუართან“. ამ ჯგუფში მოსახვედრად აუცილებელია, როგორც ვენახების მოვლა ბიოდინამიკის პრინციპების გათვალისწინებით, ასევე უმეტეს თანამედროვე ენოტექნოლოგიურ ხერხებზე უარის თქმა. მაგალითად, ჯგუფის წესდებით აკრძალულია, სელექციური საფუარების, გამწებავი საშუალებების, წვრილი ფილტრების, ოსმოსური ტექნოლოგიების გამოყენება. ჯგუფის წევრთა ღვინოები გადიან ყოველწლიურ უმკაცრეს სადეგუსტაციო შემოწმებას.
2009 წლის 23 ივნისს ქალაქ ბორდოში კონგრესების სასახლის საგამოფენო სივრცეში ზემოთ ნახსენებ ჯგუფთან ერთად პირველად წარსდგა ღვინის ქართული კომპანია “თავად მაყაშვილის მარანი”. ჯგუფის მესვეურთა თქმით, წლევანდელი გამოფენა დამთვალიერებელთა მანამდე არნახული სიმრავლით გამოირჩეოდა. მომსვლელთა შორის ჭარბობდნენ პროფესიონალები – ჟურნალისტები, ნეგოციანტები, კავისტები, მეცნიერი და პრაქტიკოსი მეღვინეები მთელი მსოფლიოდან, რაც უდავოდ მოწმობს მევენახეობა-მეღვინეობის ამ სეგმენტის პოპულარობის ზრდას.
“თავად მაყაშვილის მარანმა” ბორდოში წარადგინა ქვევრის ორი ღვინო: 2006 წლის ჭაჭა-კლერტზე დადუღებული რქაწითელი, სოფელ კარდანახის წარაფიდან, და 2007 წლის ანსამბლაჟი რქაწითელი, მწვანე, ხიხვი სოფელ ბაკურციხის ლეღვიანის მამულიდან, უდედოდ დაყენებული. ორივე ღვინომ სპეციალისტების დიდი მოწონება დაიმსახურა, ბევრი მათგანის შეფასებით კი აქ წარმოდგენილ თეთრ, მშრალ ღვინოებს შორის საუკეთესო სწორედ ქართული ღვინოები იყო.
© vinoge.com
ბეჭდვა
თქვენი კომენტარი