საქართველოს პარლამენტმა მესამე მოსმენით მიიღო ცვლილებები საქართველოს კანონში სასოფლო-სამეურნეო კოოპერატივების შესახებ, საქართველოს კანონში მეწარმეთა შესახებ და საქართველოს კანონში გრანტების შესახებ.
სასოფლო-სამეურნეო კოოპერატივების შესახებ საქართველოს კანონის ახალი რედაქციის მიხედვით, დაწესდა არაწევრებისგან წარმოებული სასოფლო-სამეურნეო პროდუქციის შესყიდვასთან და მომსახურების გაწევასთან დაკავშირებული შეზღუდვა. ეს კი იმას ნიშნავს, რომ არაწევრებისგან მიღებული პროდუქციის / მომსახურების ღირებულება არ უნდა აღემატებოდეს კოოპერატივის წლიური სასოფლო-სამეურნეო სასაქონლო ბრუნვის 30 %-ს.
განისაზღვრა დივიდენდისა და სასოფლო-სამეურნეო კოოპერატივის სარეზერვო ფონდში არსებული თანხის განკარგვის წესებიც. კანონის ახალი რედაქციით, მეპაიეთა რეესტრის სავალდებულო წარმოების წესი დადგინდება სოფლის მეურნეობის მინისტრის ბრძანებით.
კანონში გამოყენებულ ტერმინებს დაემატა „დამატებითი საპაიო შენატანი“ და „კოოპერაციული შემოსავალი“.
რაც შეეხება, საქართველოს კანონში გრანტების შესახებ - შესულ ცვლილებებს, სსიპ სასოფლო-სამეურნეო კოოპერატივების განვითარების სააგენტოს მიენიჭა გრანტების გაცემის უფლება.
სასოფლო-სამეურნეო კოოპერატივების განვითარების სააგენტოში აცხადებენ, რომ ცვლილებები კანონში ემსახურება საქართველოში კოოპერატივების მოდელის სრულყოფასა და კოოპერატივებსა და მეპაიეებს შორის საწარმოო ურთიერთობების რეგულირებას.
© საქართველოს ღვინის კლუბი, ღვინის საინფორმაციო ცენტრი
ბეჭდვა
თქვენი კომენტარი