ჩეხეთის მეღვინეთა ასოციაციამ ყურძნის მოსავლის მოცულობის მონაცემები გამოაქვეყნა. შედეგად, გასული, 2010 წელი ბოლო 25 წლის მანძილზე ყველაზე ცუდ და წარუმატებელ წლად შეფასდა. შარშან ჩეხებმა 16 ათას ჰექტარზე გაშენებული ვენახებიდან საერთო ჯამში 45 923 ტონა ყურძენი მიიღეს, რაც წინა წელთან შედარებით სამჯერ, 2007-2008 წლებთან შედარებით კი ორჯერ ნაკლებია. ყურძნის ასეთი ცუდი მოსავალი ჩეხეთში 1986 წლის მერე არ დაფიქსირებულა. ამგვარი შედეგი საკმაოდ ნალექიანი ამინდების დამსახურებაა, რამაც ვაზის სოკოვანი დაავადების წარმოშობა გამოიწვია, რასაც თან ერთვოდა სეტყვაც. მიუხედავად ასეთი ცუდი მოსავლისა, ღვინოზე ფასები, სავარაუდოდ, გაიზრდება, თუმცა საეჭვოა, ჩეხმა მეღვინეებმა დანაკარგი აინაზღურონ. საერთო ჯამში ჩეხეთში შარშან 380 ათასი ლიტრი ღვინო აწარმოეს. სამამულო წარმოების ღვინის რაოდენობის შემცირება, სავარაუდოდ, იმპორტირებული ღვინის წილის ზრდას გამოიწვევს.
© ღვინის კლუბი/Weekend
ბეჭდვა
თქვენი კომენტარი