2 დღის წინ ასეთი სათაურით გამოქვეყნდა სტატიები ცნობილი გამოცემებში The Drinks Business და harpers.co.uk. მართალია რაოდენობა დიდი ბრიტანეთისთვის განსაკუთრებულად შთამბეჭდავი არაა (168,307 ბოთლი 2019 წელს, 2018 წლის 105,608 ბოთლთან შედარებით), სამაგიეროდ ძალზე მნიშვნელოვანია წინსვლა, რომელიც 62%–ით გამოიხატა. ბოლო 15 წლის მანძილზე ასეთი წინსვლა მხოლოდ ერთხელ, 2011 წელს დაფიქსირდა. მაშინ 56 464 ბოთლი შევიდა ბრიტანულ ბაზარზე, რამაც 100%–ზე მეტი ზრდა აჩვენა 2010 წელთან შედარებით (25 334). მთლიანობაში ბრიტანული ბაზარი საკმაოდ რთული აღმოჩნდა ქართული ღვინისთვის და მონაცემები ყოველწლიურად ძალზე ცვალებადია ხოლმე.
2005 – 93,523
2006 – 78,354
2007 – 54,280
2008 – 34,460
2009 – 20,918
2010 – 25,334
2011 – 56,464
2012 – 38,818
2013 – 62,668
2014 – 82,318
2015 – 76,049
2016 – 97,226
ცხადია ასეთ წინსვლაში დიდი წვლილი ტრადიციული, ქვევრის ქართული ღვინის მწარმოებლებს მიუძღვით, განსაკუთრებით კი ე.წ. ნატურალური მიმდინარეობის წარმომადგენლებს, რომელთა ღვინოებმაც ბევრი სხვა სტილის ღვინოსაც გაუხსნა გზა დიდ ბრიტანეთში.
2020–ში არაერთი ღონისძიებაა დაგეგმილი ინგლისში, რომელიც ქართული ღვინის ცნობადობას კიდევ უფრო გაზრდის. ერთ–ერთი ასეთია სარა ებოტის (Sarah Abbot MW) პრეს–დეგუსტაცია ლონდონში 25 მარტს, სადაც 100–ზე მეტი ქართული ღვინო იქნება წარმოდგენილი და ასევე ქართული ღვინის მასტერკლასი. London Wine Fair 2020–ზე მაისში 14 ქართული კომპანია მიიღებს მონაწილეობას, დეგუსტაციები გაიმართება ედინბურგსა და ბრისტოლში, ასევე National Geographic Traveller Show–ზე, ივლისში.
სტატიებში რამდენიმე წამყვანი დისტრიბუტორიცაა ნახსენები – Boutinot’s, Hallgarten Novum, Berkman, Amathus.
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი