ქილებში ჩამოსხმული ღვინო

ავსტრალიურმა კომპანია Winestar-მა, რომელიც ალკოჰოლურ პროდუქციას ამზადებს და ყიდის, ღვინის ინდუსტრიაში სიახლე შემოიტანა – ღვინოს ალუმინის ქილებში ასხამს და ასე გააქვს ბაზარზე. კომპანიის მესვეურები საკუთარ გადაწყვეტილებას ,,მაღალხარისხიანი ღვინის მოხმარებაში რევოლუციად” აფასებენ და დარწმუნებულნი არიან, რომ მყიდველი ამ სიახლეს დიდი ენთუზიაზმით შეხვდება. ალუმინის ქილებში ჩამოსასხმელად კომპანიამ მარან Château de l‘Ille-ს ღვინო შეარჩია, მომავალში კი ბორდოს, ბურგუნდიის, პროვანსის, ბოჟოლეს, რონის, ლანგედოკისა და ალზასის ღვინის ალუმინის ქილებში ჩამოსხმაც იგეგმება. გარდა ამისა, კომპანია მცირე საწარმოებთან თანამშრომლობას და ამ გზით მათთვის  პროდუქციის გასაღებაში დახმარებასაც აპირებს.

© ღვინის კლუბი/Weekend