მწირი მოსავლის გამო წელს საფრანგეთში ღვინო გაძვირდება

ცუდი ამინდებისა და უხვი ნალექის გამო წელს საფრანგეთში ბოლო 40 წლის განმავლობაში ყურძნის ყველაზე მწირი მოსავალი მიიღეს. ექსპერტები ვარაუდობენ, რომ ასეთი მოსავლის შედეგად ღვინის ფასი საგრძნობლად მოიმატებს, თავად მეღვინეებმა კი განაცხადეს, რომ მათი პროდუქცია 15-20%-ით გაძვირდება. მევენახეთა ანგარიშით, წლევანდელი მოსავალი დაახლოებით 43,5 მილიონი ჰექტოლიტრი იქნება. საფრანგეთის ბევრ რეგიონში რთველი 2 კვირით გვიანაც კი დაიწყეს, რათა მარცვალი მზის სითბოთი და სინათლით სათანადოდ “დამუხტულიყო”. როგორც საფრანგეთის სოფლის მეურნეობის სამინისტრო იუწყება, სავარაუდოდ, არც მომავალი წელი იქნება დიდად საიმედო, ამიტომ უახლოეს მომავალში ამ საკითხის განსახილველად ღვინის ექსპერტთა შეხვედრა გაიმართება.

© ღვინის კლუბი/Weekend