– როდის გადაწყვიტეთ მარნის დაარსება და რა იყო ამის მიზეზი?
– მარნის დაარსება გადავწყვიტე 2015 წელს, როდესაც თბილისში ახალი ღვინის ფესტივალზე მივიღე მონაწილეობა.
– ვაზის რომელი ჯიშები გაქვთ გაშენებული და კიდევ რომელ ჯიშებზე აპირებთ ყურადღების გამახვილებას?
– ვაზის ჯიშებიდან გაშენებული მაქვს ციცქა და ცოლიკოურის ჯიშები. უმეტესად ცილოკოური ჭარბობს. ყურადღების გამახვილებას ვაპირებ ძველ ჯიშებზე, წელს დავრგე 170 ძირი ჩხავერი, სამომავლოდ ვაპირებ ოცხანური საფერეს გაშენებას.
– რა ღვინოებს აწარმოებთ და რითაა გამორჩეული თქვენი ღვინო?
– ვაწარმოებ ციცქა-ცოლიკოურს. ღვინოს ვაყენებ მუხის კასრში. გამორჩეულია იმით, რომ არის ნატურალური, დამზადებულია საოჯახო ტარდიციებით, ბუნებრივად დაწმენდილია და არის დანამატების გარეშე.
– გაიხსენეთ საქართველოში ღვინის გაყიდვის თქვენი პირველი გამოცდილება, რომელ მაღაზიებთან გქონდათ ურთიერთობა?
– თავიდანვე ღვინოს ადგილობრივად ვყიდდი, მაგრამ გაოცებული დავრჩი, როდესაც ახალი ღვინის ფესტივალზე ერთ-ერთმა უცხოელმა ერთ ლიტრ ღვინოში 40 ლარი გადამიხადა. პირველად შევიტანე მაღაზიაში ,,8000 მოსავალი’’, შემდეგ სხვა მაღაზიები დამიკავშირდნენ. ამჟამად დაახლოებით 10 მაღაზიასთან მაქვს ურთიერთობა.
– გადის თუ არა თქვენი ღვინო უცხოეთის ბაზარზე?
– უცხოეთის ბაზარზე ჩემი ღვინო არ გადის.
– რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
– ღვინოსთან და ვაზთან მუშაობა ძალიან შრომატევადია. საჭიროა მევენახეობა და მეღვინეობაში ცოდნის ამაღლება. მცირე მარნებს უფრო მეტი გასაღების ბაზარი სჭირდება.
– თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებისთვის?
– ღვინის კულტურა ვერ განვითარდება თეორიული ცოდნის გარეშე, საჭიროა მეტი ტრენინგები მეღვინეებთან, რაც სამწუხაროდ რეგიონში არ ტარდება. მხოლოდ ფესტივალების საშუალებით ხდება მარნების გაცნობა და მათი ღვინოების დაგემოვნება.
– რას ურჩევდით დამწყებ მევენახე–მეღვინეებს?
– ვურჩევდი, მეტი განათლება მიიღონ ამ სფეროში.
მარნის დასახელება: გია ჯამბერიძის საოჯახო მარანი
მარნის მისამართი: გურია, ჩოხატაური, სოფ. გორაბერეჟოული.
ტელეფონი: +995 577 62 52 18
ელფოსტა: giajamberidze@gmail.com
ვებ/ფეისბუკ გვერდი: gia jamberidze
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი