ღვინის დეგუსტაცია

ეს, რა თქმა უნდა, პროფესიონალთა საქმეა! თუმცა, გარკვეულ წესებს თუ გაითვალისწინებს, ნებისმიერი მოყვარული შეძლებს ღვინის შეფასებას. მართალია, პროფესიონალურ დასკვნას ვერ გააკეთებს, მაგრამ იმას მაინც გაარკვევს, დაილევა თუ არა ღვინო.

ვფიქრობთ, რჩევები, რომლებსაც შემოგთავაზებთ, აუცილებლად დაეხმარება ნებისმიერ დაინტერესებულ მკითხველს: სადეგუსტაციო ჭიქა მაღალფეხიანია და მოგრძო, ოვალური ფორმა აქვს. ჭიქას ერთ მესამედზე ავსებენ ღვინით. დეგუსტაციისას მნიშვნელოვანია ღვინის ტემპერატურა, რაც უშუალოდ ღვინის ტიპზეა დამოკიდებული: თეთრი მშრალი მსუბუქი ღვინოები 12-14-ზე ისინჯება; თეთრი მშრალი სხეულიანი ღვინოები 14-16-ზე; წითელი მსუბუქი ღვინოები 16-18-ზე ისინჯება; წითელი სხეულიანი ღვინოები კი 17-20-ზე; არ შეიძლება ღვინის შეფასება აღნიშნულზე დაბალ ან მაღალ ტეპერატურაზე, რადგან ამ დროს გემოვნების ორგანოები სათანადოდ ვერ აღიქვამენ ღვინის ბუკეტისა და არომატის წარმომქმნელ ნივთიერებებს. ამიტომ დეგუსტაციის დაწყებამდე რამდენიმე საათით ადრე ღვინო ან უნდა შევათბოთ, ან გავაცივოთ შესაბამის ტემპერატურამდე.

ღვინის გამჭვირვალობა და ფერი თეთრ ფონზე ფასდება. სადეგუსტაციო ჭიქის ხელში იჭერენ ფეხით და არა მუცლით. ჭიქას ჯერ სიგანეზე გახედავენ, შემდეგ წინ დახრიან და ზემოდან აკვირდებიან. ღვინის შეფასებას ფერზე დაკვირვებით იწყებენ. იგი გამჭვირვალე უნდა იყოს. ფერის ტონი და ინტენსივობა მიგვითითებს ღვინის ასაკსა და წარმოშობაზე: ახალგაზრდა თეთრი ღვინო ღია ყვითელი ფერისაა და მომწვანო ელფერი დაჰკრავს; დროთა განმავლობაში კი ოქროსფერი ხდება და მუქდება, რაც უკვე სიძველის ნიშანია. ახალგაზრდა წითელი ღვინო ინტენსიური წითელი ფერისაა და მოიისფრო-წითელში გადადის. ასაკის მატებასთან ერთად ღვინო ყავისფერი ტონებით ივსება, რასაც ოქსიდირებული ტანინები განაპირობებს. თუ ღვინოს წითელი ელვარება აკლია, ის უკვე "მკვდარია".

ფერის ინტენსივობა მიუთითებს იმაზეც, რამდენად მწიფე იყო ყურძენი დაწურვისას: რაც უფრო ინტენსიურია ფერი, უფრო კარგი გემოსი იქნება ღვინო. თუ ღვინო მღვრიეა, ეს იმას ნიშნავს, რომ იგი არასასურველ - კოლოიდურ ნივთიერებებს შეიცავს. სადეგუსტაციო ჭიქის წრიული მოძრაობისას აქროლადი და არომატული ნივთიერებები უკეთ გამოიყოფა და საშუალებას გვაძლევს, გავეცნოთ ღვინოს. კასრებში ღვინის დავარგების დონის უკეთ დასადგენად კარგი ხერხია დაცლილ ჭიქაზე დაკვირვება.

ჭიქას შერჩენილ ღვინის სურნელს ნაზად შეისუნთქავენ, რათა უკეთ აღიქვან მისი ბუკეტი. ღვინოში გამოიყოფა შემდეგი ძირითადი არომატები: - ყვავილების; - ახალი ხილის; - გამხმარი ხილის; - ბალახისა და ფოთლის; - მოხალვის სუნი; - სუნელები; რაც შეეხება ღვინის ასაკის დადგენას, ფერის გარდა, ეს გემოთიც შეიძლება. ახალგაზრდა ღვინოები საკმაოდ მწკლარტეა და უხეში. ასაკის მატებასთან ერთად ღვინის გემო სულ უფრო რბილი, ჰარმონიული და დახვეწილი ხდება. ღვინის გასინჯვის შემდეგ სასაზე რჩება გემო, რომელიც სასმელის ხარისხზე მიგვანიშნებს. უმაღლესი ხარისხის ღვინის გემო ძალიან ნელა ქრება. ღვინის ობიექტურად შეფასებისათვის უნდა გავითვალისწინოთ შემდეგი რჩევები: დეგუსტაციისათვის საუკეთესო დროა დილა, რადგან ამ დროს მგრძნობელობა გამახვილებულია; არ შეიძლება ღვინის დეგუსტაცია სპირტიანი სასმელების დალევის შემდეგ; გახსოვდეთ, რომ ყავა, შოკოლადი, მენთოლიანი კარამელი და საღეჭი რეზინი, ნიგოზი, მწარე და ცხარე საჭმელი და სხვა, არასასურველ გავლენას ახდენს ღვინის გემოს და ბუკეტის სწორად აღქმაზე; ღვინის დეგუსტაცია არ ტარდება ჭამის შემდეგ.

© "ქვევრი"