ჩინეთში ღვინის ეროვნული სააგენტოს მარკეტინგული კამპანია გრძელდება. ამჯერად ქალაქ შენჟენში ქართული ღვინის დეგუსტაცია და სამუშაო შეხვედრა ჩატარდა. სამუშაო შეხვედრას ჩინეთის ღვინისა და ალკოჰოლური სასმელების ერთ-ერთი ყველაზე მასშტაბური გამოფენის, INTERWINE Guangzhou-ს დირექტორი, რიტა ჯია უძღვებოდა.
სამუშაო შეხვედრის მონაწილე პროფესიონალებმა განიხილეს ჩინეთის ბაზარზე ქართული ღვინის შესაძლებლობები და გამოწვევები.
დეგუსტაციაში მონაწილეობას იღებდა ღვინის 60-მდე ადგილობრივი დისტრიბუტორი, იმპორტიორი, ღვინის სპეციალისტი და მოყვარული. წარმოდგენილი იყო 6 კომპანიის ღვინოები: ბესინი, მეღვინეობა ხარება, კახური ღვინის მარანი, დუგლაძეების ღვინის კომპანია, ასკანელი ძმები, ბატონო.
ღონისძიება ორგანიზებული იყო პეკინში ქართული ღვინის პოპულარიზაციის ცენტრის მიერ. ქართული ღვინის პოპულარიზაციის კამპანიის შედეგად ჩინეთში ქართული ღვინის ექსპორტი, შარშანდელთან შედარებით, 87 %-ით გაიზარდა და, 10 თვის მონაცემებით, 1.8 მლნ ბოთლს გადააჭარბა.
© საქართველოს ღვინის კლუბი, ღვინის საინფორმაციო ცენტრი
ბეჭდვა
თქვენი კომენტარი