სასიხარულოა, რომ საქართველოში მევენახეობასთან დაკავშირებული სამეცნიერო კვლევა-ძიება მაინც გრძელდება. ამის დასტურია, ცოტა ხნის წინ, გამომგონებელ გ. თოფურიას მიერ შექმნილი მექანიზმი, რომლის მეშვეობითაც ვენახების სეტყვისგან დაცვა გახდება შესაძლებელი.
ორიგინალური გამოგონების არსი მდგომარეობს შემდეგში: ვენახის მთელს მწკრივზე მონტაჟდება ქოლგისმაგვარი გადასახური გასაშლელ-დასაკეცი მოწყობილობა. გადასახურავ მასალად გამოყენებულია სეტყვაგამძლე წვრილი ბადისებრი ქსოვილი. მოწყობილობის კონსტრუქცია შედგება რეზინისა და პლასტმასისი მილების ერთიანი სისტემით. საწყის მდგომარეობაში მოწყობილობა იმყოფება დაკეცილ მდომარეობაში. სეტყვის მოლოდინის დროს მილსადენთა ერთიან სისტემას მიეწოდება შეკუმშული ჰაერის ნაკადი, რის შედეგადაც მოწყობილობა იშლება და რამოდენიმე წუთის განმავლობაში ახდენს ვენახის მთლიაn გადახურვას. მოწყობილობის მუშაობაში მოსაყვანად საჭიროა მხოლოს ღილაკზე თითის დაჭერა. მუშა მდგომარეობიდან საწყის მდგომარეობაშ გადაყვანა კი ხდება მილსადენთა ერთიანი სისტემიდან ჰაერის გამოდევნის საშუალებით.
როგორც გამომგონებელი ირწმუნება, აღნიშნული მოწყობილობა შესაძლებელია აგრეთვე გამოყენებულ იქნას ვენახის ფრინველებისაგან დასაცავად, რაც აუცილებელია ისეთი ყურძნის ჯიშებისათვის, რომლის მოკრეფაც ხდება გვიან შემოდგომაზე ან ზამთრის დასაწყისში. სეტყვა არამხოლოდ საქართველოში, არამედ მთელს მსოფლიოში მევენახეების ერთ-ერთ ყველაზე მნიშვნელოვან და ხშირ შემთხვევაში გადაუჭრელ პრობლემად ითვლება. სეტყვისაგან ხშირად მთელი რეგიონის ვენახებიც კი ნადგურდება. ამიტომ იტალიაში, საფრანგეთში, ესპანეთში, საბერძნეთში, შვეიცარიაში, ავსტრიასა და გერმანიაში ბადით გადახურულია ათასობით ჰექტარი ვენახი. ეს ფაქტი მეტყველებს,თუ რაოდენ აქტუალურია ვენახების სეტყვისაგან დაცვა, ვაზის გადარჩენა.
ვენახების სეტყვისაგან დამცავი მოწყობილობა, რომელიც ქართველმა გამომგონებელმა შექმნა, საყოველთაო აზრით, გამოირჩევა ტექნოლოგიური სიახლით და გააჩნია მაღალი საექსპლუატაციო მახასიათებლები. თუმცა, საბოლოო სიტყვა მაინც მევენახეებს ეკუთვნით, რომლებმაც აღნიშნული გამოგონება პრაქტიკაში უნდა დანერგონ.
ბეჭდვა
მეგობრებო, გთხოვთ ქართული შრიფტით ვწეროთ.