ვერონას მახლობლად, ჩერეაში წელს უკვე მეცამეტეჯერ ჩატარდა ნატურალური მეღვინეობის საერთაშორისო გამოფენა ViniVeri. ღონისძიება 8-10 აპრილს მიმდინარეობდა და მასში ათამდე ქართულმა ღვინის კომპანიამ მიიღო მონაწილეობა: ოქროს ღვინო, ხოხბის ცრემლები, ართანული ღვინო, ალაფიანი, ნათენაძეს მარანი, გოცას ღვინო, დორემი, კორტავების მარანი.
მნიშვნელოვანია, რომ ყოველწლიურად ასეთი ტიპის ღონისძიებებზე ახალი მარნები ჩნდებიან. შარშანდელისგან სრულიად განსხვავებული იყო ViniVeri-ზე წარმოდგნილი წლევანდელი ქართული შემადგენლობა, რაც საშუალებას იძლევა რაც შეიძლება მეტმა დამწყებმა მევენახე-მეღვინემ დაიმკვიდროს ბაზარზე თავისი ადგილი.
ძალზე საინტერესოა უცხოელი მომხმარებლის დამოკიდებულებაც ქართული ღვინის მიმართ. მაგალითად, თუკი რამდენიმე წლის წინ ქართული ჯიშები და ქვევრის მეთოდი გაკვირვებას იწვევდა სტუმართა შორის, წელს უკვე ყველა კარგადაა ინფორმირებული, არც ქვევრი უკვირთ ისე და რაც მთავარია, ეს ღვინის მოყვარულები შესანიშნავად იცნობენ, უყვართ და აფასებენ ქართულ ღვინოს, ეძებენ ახალ გემოებს.
ViniVeri-ზე ქართველების გარდა ათეულობით სხვა ქვეყნის მეღვინეებიც იღებდნენ მონაწილეობას. ყველაზე მრავალრიცხოვანი რა თქმა უნდა იტალიური ჯგუფი იყო, აქვე იყვნენ სლოვნიელი, ავსტრიელი, ფრანგი, ესპანელი ნატურალისტი მეღვინეები.
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი