„ბადაგონი“ საუკეთესო ღვინოების ასეულშია

ბადაგონის ღვინოს „ალავერდის ტრადიციები“ წლევანდელ დეკანტერზე ჟიურის უმაღლესი ჯილდო გრან-პრი - „რეგიონალური ტროფი“ ერგო და ამავდროულად ევროპის საუკეთესო წითელი ღვინოების ასეულში შევიდა. 

 „დეკანტერი 2010“ წარმატებული აღმოჩნდა არა განკერძოებულად „ბადაგონისათვის“, არამედ მთლიანად ქართული ღვინისა და მისი პოპულარიზაციისათვის, ღვინით გაჯერებულ მსოფლიო ბაზარზე, ამბობს  „ბადაგონის“ საზოგადოებასთან ურთიერთობის დეპარტამენტის თავმჯდომარე ლიზა ბაგრატიონი. მნიშვნელოვანია ის ფაქტი, რომ დეკანტერის გრან-პრი - „რეგიონალური ტროფი“ „ბადაგონის“ წითელ მშრალ „ალავერდის ტრადიციებს“ ერგო და ამავდროულად ის ევროპის საუკეთესო ღვინოების ასეულშიც შევიდა. ამასთანავე, დეკანტერზე ესოდენ მაღალი ჯილდო ქართულ ღვინის კომპანიას პირველად მიანიჭეს“.

„ალავერდის ტრადიციები“ ალავერდის მონასტრის ისტორიულ მარანში დაიწურა და ჩამოისხა უშუალოდ დოქტორ დონატო ლანატის - ბადაგონის მთავარი მეღვინის მიერ. მის ექსპორტსა და პოპულარიზაციაზეც ბადაგონი ზრუნავს, - აცხადებს „ბადაგონის“ გენარალური დირექტორი გიორგი სალაყაია. დაჯილდოების ორგანიზატორების განცხადებით, ლონდონში გამართულ ცერემონიაზე წელს რეკორდული რაოდენობის ევროპული ღვინის კომპანიები დააჯილდოვეს, ხოლო მოწვეულ მაღალ სტუმრებს პირველად ჰქონდათ საშუალება, კონკურსში გამარჯვებული ღვინოები დაეგემოვნებინათ.

აღსანიშნავია, რომ კონკურსის ორგანიზატორების ინფორმაციით, გრან-პრი „რეგიონალური ტროფი“ კონკურსში მონაწილე 11 ათასზე მეტი ღვინიდან  მხოლოდ ასმა მიიღო და მათ შორის პირველად მოხვდა ქართული ღვინის კომპანია.