რაჭა–ლეჩხუმში რთველი დაიწყო

რთველი საქართველოს კიდევ ერთ უმნიშვნელოვანეს ღვინის რეგიონში, რაჭა–ლეჩხუმშიც დაიწყო.

როგორც ცნობილია, რაჭაში ძირითადი დატვირთვა ნახევრადტკბილი ღვინის, „ხვანჭკარის“ დამზადებაზე მოდის (ჯიშები: ალექსანდროული და მუჯურეთული), თუმცა ასევე მნიშვნელოვანია ისეთი ჯიშების წილიც, როგორიცაა ძელშავი, ცოლიკოური და წულუკიძის თეთრა.

ლეჩხუმში უმთავრესად ტვიშის ზონაზეა ყურადღება გამახვილებული (ჯიში: ცოლიკოური), თუმცა ორბელური ოჯალეშის და უსახელოურის რთველზეც დიდწილადაა დამოკიდებული ადგილობრივი ეკონომიკა.

ღვინის ეროვნული სააგენტოს მონაცემებით, ამჟამად გადამუშავებულია 257 075 კგ ყურძენი, მათ შორის, „სახვანჭკარე“ ჯიშები ალექსანდროული და მუჯურეთული - 255 323 კგ. გადამუშავებულია ასევე ძელშავის ჯიშის ყურძენი - 1752 კგ.

ამ ეტაპისთვის ამბროლაურის რთველის საკოორდინაციო შტაბში დარეგისტრირებულია 20 ღვინის კომპანია, მათ შორის, 1 სახელმწიფო კომპანია, დანარჩენი კერძო კომპანიები.

საწყის ეტაპზე გახსნილია 6 მიმღები პუნქტი - 3 ქალაქ ამბროლაურში და 3 სოფლებში: ჭრებალო, ბუგეული და ხვანჭკარა. რთველის პროცესში განსაზღვრულია ჩაბარების  საათები - 10:00 საათიდან 18:00 სათამდე.  

ყურძნის მოსავლის რეალიზაციის ხელშეწყობის მიზნით, საქართველოს მთავრობის გადაწყვეტილებით, ღვინის კომპანიებში ყურძნის ჩამბარებელ ფიზიკურ პირებზე  სუბსიდია გაიცემა:

 რაჭა-ლეჩხუმისა და ქვემო-სვანეთის რეგიონში: მუჯურეთული / ალექსანდროულზე -  1 კგ-ზე - 2 ლარი.

© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი