დურიანი - ხილი, რომელიც ძირითად სამხრეთ-აღმოსავლეთ აზიაში გვხვდება, გარედან მსხვილი და მაგარი ქაცვით არის დაფარული, შიგნით კი მოყვითალო რბილობი აქვს. დურიანი ადამიანებს ან ძალიან უყვართ, ან სძულთ. ამ ხილს იმდენად მძაფრი და უსიამოვნო სუნი აქვს, რომ საზოგადოებრივი თავშეყრის ადგილებსა და სასტუმროებში მისი ჭამა (და შეტანაც კი) ერთ დროს იკრძალებოდა კიდეც, თუმცა გემოთი შესანიშნავი ხილია. ვიდრე ნახევარი მსოფლიო მისი გემოს ავკარგიანობაზე საუბრობს, სინგაპურელებმა დრო იხელთეს და დურიანისგან ღვინის დამზადებას შეუდგნენ. სინგაპურის უნივერსიტეტის მეცნიერები დღემდე მუშაობენ დურიანის დაღვინების მეთოდებზე. იმისათვის რომ ამ ხილისგან ღვინო დაიწუროს, თავდაპირველად, ხილს ფცქვნიან და რბილობს იღებენ. შემდეგ რბილობს სრესენ და დადუღებისათვის წყალს უმატებენ, საბოლოოდ კი მზადდება 6%-იანი ღვინო. “დურიანის მოყვარულთათვის ეს მეტად საინტერესო სასმელი იქნება. ხოლო მათ, ვისაც არ უყვარს ეს ხილი, ვურჩევ, აუცილებლად გასინჯონ, რადგან თავად ხილისაგან განსხვავებით მას უსიამოვნო სუნი არ ასდის და პირიქით, საუცხოო არომატითაც კი გამოირჩევა.” – განმარტავს მეცნიერი ფრანცისკა ტანიასური.
© ღვინის კლუბი /Weekend
ბეჭდვა
თქვენი კომენტარი