თბილმა შემოდგომამ გერმანული მოსავალი იხსნა

გერმანელი მეღვინეები თვლიან, რომ წლევანდელი ღვინო თბილმა და მზიანმა სექტემბერმა გადაარჩინა. ცივი მაისისა და წვიმიანი ივნისის გამო ვარაუდობდნენ, რომ მოსავალი მთლად კარგი ხარისხის ვერ იქნებოდა, მაგრამ სექტემბრის სითბომ ყურძენს კარგად დამწიფების საშუალება მისცა. ფრანკონიასა და ვიურტემბერგში მოსავალი დიდი რაოდენობით არ გამოირჩეოდა, სამაგიეროდ საქსონიასა და შუა რეინის რაიონში, გასულ წელთან შედარებით, თითქმის ორჯერ მეტი მოსავალი მიიღეს. 9 მილიონი ჰექტოლიტრი ღვინო - ასეთია წლევანდელი პროგნოზი და ეს მაჩვენებელი უკანასკნელი ათი წლის საშუალო მაჩვენებელს უტოლდება. ექსპერტები ვარაუდობენ, რომ უახლოეს მომავალში ღვინის გაძვირება მოსალოდნელი არ არის. გერმანელ მეღვინეთა კავშირის პრეზიდენტი ნორბერტ ვებერი (Norbert Weber) წლევანდელ მოსავალს ოპტიმისტურად უყურებს და საუკეთესო ხარისხის ღვინის მიღების იმედი აქვს. გერმანული ღვინის ინსტიტუტის (Deutsches Weininstitut, DWI) დირექტორის - მონიკა როილეს (Monika Reule) თქმით კი, წლევანდელი მოსავლის ღვინო, ფასისა და ხარისხის თანაფარდობის გათვალისწინებით, არა მარტო ადგილობრივ ღვინის მოყვარულებს დააინტერესებს, არამედ საზღვარგარეთაც დიდ პოპულარობას მოიპოვებს და ბაზარზე შარშან დაკარგულ პოზიციებს აღიდგენს.

© ღვინის კლუბი/Weekend