დღის ფოტო: „ხედი ქვევრის შიგნიდან...“

ფოტო: ლუკ კარვერი, „ხედი ქვევრის შიგნიდან, რთველის დროს საქართველოში“

World Food Photography Awards მსოფლიოში საკვებისა და სასმელის ფოტოგრაფიის ერთ-ერთი ყველაზე პრესტიჟული საერთაშორისო კონკურსია, რომელიც 2011 წლიდან აერთიანებს პროფესიონალ და მოყვარულ ფოტოგრაფებს მსოფლიოს სხვადასხვა ქვეყნიდან. World Food Photography Awards განსაკუთრებულ მნიშვნელობას ანიჭებს  ისეთ ფოტოგრაფიას, რომელიც საკვებისა და სასმელის კულტურას ისტორიული და ეთნოგრაფიული თვალსაზრისითაც წარმოაჩენს. Produce ქვეკატეგორია სწორედ პროდუქტის წარმოშობასა და მისი შექმნის პროცესს ეძღვნება.

2026 წლის კონკურსზე ამ კატეგორიაში გამარჯვებული გახდა ბრიტანელი ფოტოგრაფი ლუკ კარვერი, რომლის მონოქრომული ნამუშევარი საქართველოში, 2025 წლის რთველის პერიოდში, ქვევრის შიდა სივრციდან არის გადაღებული. ფოტომ ჟიურის ყურადღება უჩვეულო ხედვის წერტილითა და ქართული მეღვინეობის ტრადიციის ორიგინალური ინტერპრეტაციით მიიპყრო.

ფოტო რთველისა და ღვინის დაყენების პროცესს გვიჩვენებს. ამგვარი უჩვეულო პერსპექტივა ქვევრს ისტორიის, ტრადიციისა და კულტურული მეხსიერების სიმბოლოდ წარმოგვიდგენს. შავ-თეთრი გამოსახულება კი ხაზს უსვამს ფორმას, ტექსტურასა და ემოციას, ხოლო მთელი კომპოზიცია ქართულ მეღვინეობას უნივერსალურ მხატვრულ ენაზე გვიყვება.

© ღვინის კლუბი/vinoge.com