Secret London 10 ქართულ რესტორანზე წერს. პირველია “იბერია”, რომელიც, როგორც ვკითხულობთ, დიდი პორციებითა და სასიამოვნო გარემოთი გამოირჩევა. სტუმრებს ქართულ ღვინოსაც სთავაზობენ, რაც იქაურ ატმოსფეროს კიდევ უფრო ავთენტურსა და უნიკალურს ხდის: “კერძები და ქართული ღვინო ერთად უფრო მძაფრად გაგრძნობინებს ქართულ, კავკასიურ გარემოს შუაგულ ლონდონში” - ვკითხულობთ სტატიაში.
Little Georgian Islington-ში მისულ სტუმარს ტრადიციული კერძები თანამედროვე ინტერიერის გარემოში ხვდება. “აქაურობა ძალიან მყუდრო გარემოთი გამოირჩევა, სადაც თავს კომფორტულად იგრძნობს ვეგანი და ვეგეტარიანელი ადამიანიც, რაც უდავოდ დიდი პლუსია” - წერს ავტორი. ეს ქართული რესტორანი ბერნსბურის ქუჩაზე ნატურალურ ღვინოებსა და ტრადიციული მეთოდით გამოხდილ ჭაჭასაც სთავაზობს სტუმარს.
სტატიაში გვირჩევენ რესტორან “გეამოს”, რომელიც განსაკუთრებით თბილი გარემოთი, მისაღები ფასებითა და ატმოსფეროთი გამოირჩევა. აქ სტუმარი ქართული ტრადიციული დესერტების გასინჯვას შეძლებს, ავტორი კი განსაკუთრებით აქებს “გეამოს” თეთრ ღვინოსაც.
The Georgian საუზმეს, ლანჩსა და ვახშამს სთავაზობს მომხმარებელს. რესტორანს შეგიძლიათ დღის ნებისმიერ მონაკვეთში ესტუმროთ და თან გემრიელი აჭარული ხაჭაპურიც მიირთვათ.
ჩამონათვალში მეათეა Kartuli - Georgian Cuisine and Wine, სადაც ღვინის მაღაზიაცაა რესტორანთან ერთად. რესტორანს თქვენს ოთხფეხა მეგობართან ერთადაც შეგიძლიათ ესტუმროთ.
ასე რომ, ლონდონში მოხვედრისას თუ თქვენი უცხოელი მეგობრისთვის ქართული კერძების გაცნობა მოგესურვებათ, მხოლოდ იმაზე ფიქრიღა მოგიწევთ, რომელ რესტორანს მიაკითხოთ, რადგან სტატიაში ქართული რესტორნების საკმაოდ ფართო არჩევანია.
© ღვინის კლუბი/vinoge.com