- როდის გადაწყვიტეთ მარნის დაარსება და რა იყო ამის მიზეზი?
- მარანი 2018 წელს დაარსდა. მიზანი მეგრული ჯიშების აღმოჩენა, აღდგენა და შენარჩუნება იყო.
- ვაზის რომელი ჯიშები გაქვთ და კიდევ რომელ ჯიშებზე აპირებთ ყურადღების გამახვილებას?
- ჩვენი მეღვინეობის მთავარი კონცეფცია ვენახების ტერასულ განლაგებას წარმოადგენს. ეს ვაზის გაშენების ერთ-ერთი უნიკალური და იშვიათი მიმართულებაა. ამ ეტაპზე ოჯალეშსა და ეგუძგურს ვაწარმოებთ.
- რა ღვინოებს აწარმოებთ და რითაა გამორჩეული თქვენი ღვინო?
- ჩვენ ოჯალეშსა და ეგუძგურს ვაწარმოებთ. ოჯალეში საქართველოში საკმაოდ ცნობილი და უნიკალური ჯიშია. ეგუძგურიც ერთ-ერთი უნიკალურია, ის ქვეყნის მასშტაბით იმ იშვიათ ჯიშებს მიეკუთვნება, რომლის ცნობადობაც ძალიან მცირეა. როგორც აღვნიშნეთ, ჩვენი მიზანი სწორედ მათი პოპულარიზაციაა.
- გაიხსენეთ საქართველოში თქვენი ღვინის გაყიდვების პირველი გამოცდილება,რომელ მაღაზიებთან გქონდათ ურთიერთობა?
- ღვინო „ალკორიუმში“ შევიტანეთ. მიზანი, პირველ რიგში, ქართულ, შემდეგ კი ევროპულ ბაზარზე გასვლაა. ასევე, ჩვენი ღირებულებების სხვებისთვის გაცნობა, ცნობადობის გაზრდა და ბაზრის შესაბამისი მიმართულების ათვისება გვსურს.
- გადის თუ არა თქვენი ღვინო უცხოეთის ბაზარზე?
- ჩვენი პროდუქცია ექსპორტზე ჯერ-ჯერობით არ გადის.
- რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
- რა თქმა უნდა, ეს არის ფინანსების საჭიროება, რათა პროდუქცია იყოს უმაღლესი ხარისხის. ასევე მუშახელის პრობლემაც დგას.
- თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებაში?
- მეღვინეებისთვის ხელშეწყობა აუცილებელია, რათა მათ პროდუქციის შექმნა გაუადვილდეთ. ასევე, ერთ-ერთი მთავარი ფაქტორი ექსპორტზე გასვლაა.
- რას ურჩევდით დამწყებ მევენახე-მეღვინეებს?
პირველ რიგში, საქმეში გათვითცნობიერება, დეტალური ინფორმაციის მიღება და ხარჯების გათვლა, ეს ყველაფერი სირთულეებისთვის მოსამზადებლადაა საჭირო. ყველა მევენახე-მეღვინეს წარმატებას ვუსურვებ.
მარნის მისამართი: მარტვილი,ტალერი
ტელეფონი: 555 000 904
ელფოსტა: taleristerasebi@yahoo.com
ვებ/ფეისბუკ გვერდი: Taleri Terrasse
© ღვინის კლუბი/vinoge.com