საქართველოს სოფლის მეურნეობის სამინისტრო ქართული ღვინის მსოფლიოში პოპულარიზაციის მიზნით ღვინის კონგრესს უმასპინძლებს. სოფლის მეურნეობის მინისტრი ბაკურ კვეზერელი ორდღიანი ვიზიტით პარიზში უკვე გაემგზავრა, სადაც ღვინის საერთაშორისო ორგანიზაციას ეწვევა და 2010 წლისთვის საქართველოში დაგეგმილი ღვინის კონგრესის ბოლო დეტალებს შეათანხმებს.
როგორც რადიო “კომერსანტს” სოფლის მეურნეობის სამინისტროდან აცნობეს, საქართველომ ამ კონგრესის მასპინძლობისთვის აუცილებელი პირობები დააკმაყოფილა, რის დასტურადაც საფრანგეთში კვეზერელი შესაბამის დოკუმენტაციას წარადგენს. ვიზიტის ფარგლებში მინისტრი ასევე შეხვდება თავის ფრანგ კოლეგას. შეხვედრაზე მხარეები სოფლის მეურნეობის სფეროში ორი ქვეყნის თანამშრომლობისა და ინვესტიციების მოზიდვის საკითხებს განიხილავენ.
ღვინის საერთაშორისო ორგანიზაცია, რომელიც 44 ქვეყანას აერთიანებს, ღვინის კონგრესს ყოველწლიურად ატარებს. წელს ამ ღონისძიებას ხორვატია უმასპინძლებს.
რადიო “კომერსანტი”
