ოქროულობის და ანტიკვარიატის სალონი „დიადემა“ ღვინის კომპანია „გიუაანი“-ს მხარდაჭერით 11 დეკემბერს 12 საათზე, კ. მარჯანიშვილის ქ. №18-ში ძველი ქართული სასმისების და ანტიკვარიატის გამოფენას გამართავს სახელწოდებით – „მეტყველი სასმისები“. გამოფენაზე წარმოდგენილი იქნება ძველი ქართული კულტურული მემკვიდრეობიდან შემორჩენილი და კერძო კოლექციებში დაცული სასმისების უნიკალური ეგზემპლარები, რომელთა ანალოგებიც არ მოიპოვება.
სტუმრებს შესაძლებლობა ექნებათ ადგილზე გაეცნონ სასმისების წარმომავლობას და მათ კულტურულ ღირებულებას. მსურველებს ასევე შეეძლებათ შეიძინონ სასურველი უიშვიათესი ორიგინალი სასმისები, რომელთა შორის იქნება გამოფენილი ვანო სარაჯიშვილის, დავით დადიანის, ალექსანდრე დადეშქელიანის და სხვა ცნობილი პიროვნებებისადმი მიძღვნილი ექსკლუზიური სასმისები. აღნიშნული ღონისძიება თითოეული მოქალაქისთვის იქნება იშვიათი შესაძლებლობა, გაეცნოს საქართველოს ისტორიულ-კულტურულ ფასეულობებს.
ოქროულობის და ანტიკვარიატის სალონი „დიადემა“ 1997 წლიდან არსებობს საქართველოს ბაზარზე და იგი არაერთი გამოფენის, საერთაშორისო პროექტის და ფესტივალის გენერალური სპონსორი და მონაწილეა. ასევე დამზადებული აქვს მრავალი ჯილდო სხვადასხვა ნომინაციებში გამარჯვებულთათვის.
© ღვინის კლუბი/vinoge.com