ცქრიალა ღვინოების ტრადიციული საცობი, როგორც ჩანს, წარსულს ჩაბარდება. იტალიურმა კომპანია Guala Сlosers-მა, რომელიც სწორედ საცობების წარმოებითაა ცნობილი, ცქრიალა ღვინისთვის ხრახნიანი საცობი გამოუშვა. სიახლე, რომელსაც სახელად Viiva ეწოდა, კომპანიამ მინის ტარის მწარმოებელ ფირმა O-I Glass-თან ერთად შეიმუშავა. როგორც Guala Сlosers-ში აცხადებენ, ახალი ხრახნიანი საცობი საშუალებას იძლევა ცქრიალა ღვინის თვისებები მისი გახსნისა და ხელახლა დახუფვის შემდეგაც დიდხანს შენარჩუნდეს, ამდენად გახსნისთანავე მისი ბოლომდე დალევა საჭირო აღარ იქნება. კომპანიის წარმომადგენლის, სიმონ იუდელევიჩის თქმით, ხრახნიანი საცობის უპირატესობა იმაშიც მდგომარეობს, რომ ნატურალურ საცობზე გაჩენილი სოკოვანი ნივთიერებები შამპანურ ღვინოს გემოს უცვლიდა და ე.წ. “საცობის არომატს” აძლევდა, ამჯერად კი მომხმარებელი ამისგან დაცული იქნება.
© ღვინის კლუბი/Weekend