ბრიტანეთის ხელისუფლებამ ანტიალკოჰოლურ კამპანიაში მორიგი სიახლე შეიტანა: ალკოჰოლის მავნებლობაზე ახლა უკვე ანიმაციური ფილმი მოგვითხრობს. ანიმაციური ფილმის დამკვეთია დიდი ბრიტანეთის ჯანმრთელობის დაცვის სამინისტრო, რომლის განცხადებითაც, ქვეყნის მოსახლეობა არასაკმარისად არის ინფორმირებული ალკოჰოლის მავნე ზემოქმედების შესახებ. მაგალითისთვის, გამოკითხული 2 000 ბრიტანელიდან უმრავლესობას წარმოდგენაც კი არ ჰქონდა იმაზე, რომ ალკოჰოლის გადაჭარბებული მიღება ჯანმრთელობას ვნებს და სხვადასხვა დაავადებას იწვევს. ხელისუფლების ასეთი მონდომება მისასალმებელია, თუმცა, ექსპერტების თქმით, მთავრობამ საფრთხის გაზვიადებით მოსახლეობის შეშინება გადაწყვიტა - მულტფილმში მოგვითხრობენ, რომ დღეში ორი კათხა მაგარი ლუდის ან ორი ჭიქა ღვინის რეგულარული სმა პირის ღრუს კიბოს რისკს სამჯერ ზრდის, არტერიულ წნევას კი საგანგაშოდ მაღლა წევს. როგორც დიდი ბრიტანეთის ჯანდაცვის სამინისტროს წარმომადგენელი, სარა ლინესი აღნიშნავს, სპირტიან სასმელს ყოველწლიურად კიბოს დაახლოებით 12,5 ათასი გამოვლენილი შემთხვევა უკავშირდება. მოძრაობა „ალკოჰოლის გონივრულად მოხმარებისთვის“ მესვეურების (რომელთა რიგებშიც ორმოცამდე ექიმი და მეცნიერი შედის) თქმით, ხელისუფლება ზედმეტად ამძიმებს მდგომარეობას და მათ მიერ გამოქვეყნებული მონაცემები აშკარად გაზვიადებულია.
© ღვინის კლუბი/Weekend