სავაჭრო ასოციაცია რუსილიონმა საფრანგეთის პრეზიდენტ ნიკოლა სარკოზის გაუგზავნა თავისი რაიონის ერთ-ერთი საუკეთესო წითელი ღვინის მაგნუმის ბოთლი. ამრიგად, რუსილიონის მესვეურებს გაუჩნდათ იმედი, რომ პრეზიდენტი მხარს დაუჭერს მათ კამპანიას, რომელიც ემსახურება საფრანგეთში წარმოებული ღვინის პოპულარიზაციას. დღესდღეობით საფრანგეთში ხშირად მოისმენთ ლოზუნგებს, რომლებიც მოსახლეობას მოუწოდებენ, შეიძინონ მხოლოდ ფრანგული წარმოების ღვინო, მიუხედავად იმისა, რომ ფრანგები ისედაც თავიანთი ღვინის ერთგულები არიან. ამისი დასტურია თუნდაც ის ფაქტი, რომ საფრანგეთში ყოველი 10 მოხმარებული ბოთლი ღვინიდან 9 ფრანგულია. გარდა ამისა, ამ დიდი გაბარიტის ბოთლით - Côtes-du-Roussillon-Villages 2008 ასოციაციას სურს შეახსენოს პრეზიდენტსა და პრეზიდეტობის კანდიდატებს, რომ ღვინის სექტორში დაკავებულია 250 000 ადამიანი, ხოლო თვით ღვინო ფრანგულ საექსპორტო საქონელში მეორე ადგილზე დგას. ამასთან, სავაჭრო ასოციაცია რუსილიონს სურს პრეზიდენტის წინაშე ხაზი გაუსვას მეღვინის პროფესიის პრესტიჟს და მოუწოდოს ნიკოლა სარკოზის მათი დაცვისაკენ.
© ღვინის კლუბი/Weekend