“ქინძმარაულის მარნის” ეს ადგილწარმოშობის ღვინო ერთ-ერთი საუკეთესოა ქართულ ბაზარზე არსებულ მუკუზნებს შორის. ღვინო ძალიან კარგადაა დაძველებული, კარგად, ანუ ყურადღებით. მას არათუ შენარჩუნებული აქვს, არამედ პირიქით, განვითარებულიც კი აქვს ის საუკეთესო თვისებები, რითაც უნდა გამოირჩეოდეს საფერავის ჯიშის ყურძნიდან დაყენებული ეს ღვინო. ფერზე ალუბლისფერია, სიძველის ნიშნებით. ძალიან მწიფე და მდიდრული არომატები აქვს, სადაც შავ მოცხარსა და შინდის ჩურჩას გამოვარჩევდი. ძალზე ჰარმონიულად მოჩანს მუხა. ღვინო კარგადაა დაბალანსებული და როგორც იტყვიან, საუკეთესო ფორმაშია. კიდევ უკეთესი იქნება, თუკი მას ცხვრის მწვადს და შემწვარ გულ-ღვიძლს მივაყოლებთ.