რუსეთის მთავრობის მსგავსად, კიეველი დეპუტატებიც გამოდიან ინიციატივით, რომ საღამოს ათი საათის შემდეგ ალკოჰოლური სასმელების გაყიდვა დედაქალაქში აიკრძალოს. როგორც კიევის ადმინისტრაციის ჯანდაცვისა და სოცუზრუნველყოფის კომისიის თავმჯდომარე, ალა შლაპაკი აცხადებს, აღნიშნულ კანონპროექტს უახლოეს დღეებში განიხილავენ. თავდაპირველად, ექსპერიმენტის სახით, კიევის მერია აპირებს დედაქალაქის ცენტრში აამოქმედოს კანონი, ხოლო მოგვიანებით სხვა უბნებზეც განავრცოს. შეგახსენებთ, რომ თავის დროზე კიევის მერმა ჩერნოვეცკიმ აკრძალა იმ რესტორნების მუშაობა საღამოს ათი საათის შემდეგ, რომლებიც საცხოვრებელ სახლებთან ახლოს მდებარეობდა, თუმცა, ამ აკრძალვამ მალევე დაკარგა აქტუალობა. გასული წლის მაისში კიევის ხელისუფლებამ აკრძალა ალკოჰოლის გაყიდვა ვაგზლებსა და მეტროებში. 2010 წლის იანვარში უმაღლესი რადას გადაწყვეტილებით, აიკრძალა ლუდის სმა საზოგადოებრივ ტრანსპორტსა და საბავშვო მოედნებზე. სკეპტიკოსები ფიქრობენ, რომ აკრძალვა შედეგს ვერ გამოიღებს, ვინაიდან კიევი უამრავი პატარა დასახლებითაა გარშემორტყმული. ისინი ქალაქს არ ეკუთვნის და შესაბამისად, არც კიევის მერიის მიერ შემოღებული ამკრძალავი კანონი იმოქმედებს.