მხატვარი და ღვინო

ლონდონში უკვე 27-ედ გაიმართა პრესტიჟული კონკურსი International Wine Challenge, სადაც მსოფლიოს საუკეთესო ღვინოდ იტალიური Brunello di Montalcino Riserva 2004 Castello Romitorio აღიარეს. ვენახი, რომელში მოწეული ყურძნითაც გამარჯვებული ღვინო დადგა, ტოსკანაში მდებარეობს და მისი მფლობელია მხატვარი სანდრო ჩია. სომელიეები ბრმა დეგუსტაციის წესით აგემოვნებდნენ ღვინოებს, წარმოდგენილ ნიმუშთა რაოდენობა კი 10 ათასს აჭარბებდა. გამოვლინდა სხვა კატეგორიაში გამარჯვებული ღვინოებიც: საუკეთესო ტკბილი ღვინო - Samling Trockenbeerenauslese 2007 di Hans Tschida Alois Kracher, საუკეთესო შუშხუნა ღვინო - Charles Heidsieck Millésime 2000, Champagnes P.& C. Heidsieck, საუკეთესო თეთრი ღვინო - Puligny Montrachet 1/er Cru Les Chalumeaux 2007 di Jean Pascal & Fils. მიღებული ჯილდოების რაოდენობით საფრანგეთი კვლავ არავის უთმობს პირველობას, წლევანდელ კონკურსზე 21 ფრანგული ღვინო აღინიშნა მედლით. მეორე ადგილზეა ავსტრალია (12), ხოლო მესამე ადგილზე – პორტუგალია 11 მედლით. რვა-რვა მედალი ერგოთ იტალიურ, გერმანულ და ახალზელანდიურ ღვინოებს. წლევანდელ კონკურსზე ნამდვილ სიურპრიზად იქცა იაპონური საკეს დაწინაურება რეიტინგებში.