უკვე მეორე წელია, ახალ ზელანდიაში ყურძნის მოსავალი მცირდება და ამ მაჩვენებელმა ახლა უკვე 30-35% მიაღწია. მიუხედავად ამისა, ახალზელანდიელი მევენახეები დიდად არ განიცდიან ამ ფაქტს, ვინაიდან 2008 წელს ყურძნის ჭარბი მოსავლით გამოირჩეოდა. საერთო ჯამში ახალ ზელანდიაში მოსავლიანობა 30-50%-ით შემცირდა, რის მიზეზადაც ცივი გაზაფხული სახელდება, თუმცა ცივმა ამინდმა, წესით, დადებითად უნდა იმოქმედოს ღვინის ხარისხზე. მევენახეობის რაიონ მალბოროში ცივი გაზაფხულისა და გრილი ზაფხულის გამო რთველი დაგვიანებით ჩატარდა, თუმცა თვითონ ვენახები უამინდობას არ დაუზარალებია. ახალი ზელანდიის სავიზიტო ბარათად მიჩნეული სოვინიონ ბლანი წელს ტროპიკული ხილის კონცენტრირებული გემოთი და კარგი მჟავიანობით ხასიათდება. მეორე ჯიშის ყურძენი – პინო ნუარი კი წელს შედარებით სქელკანიანი იყო, რაც ნაყოფის შეფერვის პერიოდში მცხუნვარე მზის ზემოქმედებით აიხსნება.