თელიანი ველის მუკუზანის მაღალი შეფასება

მსოფლიოს  წამყვანმა  ღვინის ჟურნალმა Wine Spectator-მა “თელიანი ველი”-ს ღვინოს, “მუკუზანი - 2006” მაღალი შეფასება მისცა. ჟურნალის მუდმივ რუბრიკაში what we're drinking now, რედაქტორები მათ მიერ ბოლო დროს გასინჯულ ღვინოებს გაგვაცნობენ ხოლმე და წარმოგვიდგენენ შთაბეჭდილებებს მათ შესახებ (ჟურნალში წელიწადში დაახლოებით 15 000 ღვინის დახასიათება იბეჭდება). ჟურნალ Wine spectator-ის აღმასრულებელმა რედაქტორმა, თომას მეთიუსმა “თელიანი ველის” მუკუზანს სპეციალური სტატია მიუძღვნა. ჩვენებური ღვინო ამერიკული ნორმების მიხედვით, საკმაოდ მაღალი, 88 ქულით შეფასდა. ”დასანანია, რომ ასეთი გამორჩეული და საუცხოო გემოს ღვინო შეერთებულ შტატებში დიდი რაოდენობით არ არის წარმოდგენილი” - აცხადებს თომას მეთიუსი. შეგახსენებთ, რომ Wine Spectator მსოფლიოს ყველაზე დიდტირაჟიანი გამოცემაა ღვინის შესახებ (3 მილიონზე მეტი მკითხველი), რაც კიდევ უფრო ზრდის სტატიის მნიშვნელობას “თელიანი ველისთვის” და ზოგადად ქართული ღვინის პოპულარიზაციის საქმეში.