ღვინის ეროვნული სააგენტოს ფინანსური მხარდაჭერითა და ამერიკული კომპანიის Big Sky Ranch Inc-ის ორგანიზებით, საქართველოს ცნობილი ამერიკელი ღვინის მაგისტრი ლისა პეროტი-ბრაუნი ეწვია. ვიზიტის მიზანი იყო ქართული ღვინის მრავალფეროვნების გაცნობა და მისი პოპულარიზაცია ამერიკულ ბაზარზე.
სტუმარმა კახეთის რეგიონში ქართული ღვინის მწარმოებელი კომპანიები და საოჯახო მარნები მოინახულა. ადგილზე დააგემოვნა სხვადასხვა სტილის ღვინოები და გაეცნო ღვინის დაყენების ქართულ ტრადიციებსა და ადგილობრივი მეღვინეობის თავისებურებებს.
თბილისში გამართულ სპეციალურ დეგუსტაციაზე ლისა პეროტი-ბრაუნმა დაახლოებით 50 ღვინის კომპანიის მიერ წარმოდგენილი 100-ზე მეტი ღვინო შეაფასა. დეგუსტაციის ფარგლებში მიღებული გამოცდილება და შეფასებები საფუძვლად დაედება ქართული ღვინის შესახებ მომზადებულ სტატიებს, რომლებსაც ღვინის მაგისტრი ამერიკული ონლაინგამოცემისთვის The Wine Palate მოამზადებს.
The Wine Palate საერთაშორისო ღვინოების შესახებ ექსპერტულ შეფასებებსა და განახლებად მიმოხილვებს აერთიანებს. გამოცემა მკითხველს მსოფლიოს სხვადასხვა ქვეყნის ღვინოების შესახებ ინფორმაციას აწვდის და მათ გაცნობასა და შეფასებაში ეხმარება.
ლისა პეროტი-ბრაუნი წლების განმავლობაში ძირითადად ამერიკულ და ბორდოს ღვინოებს, ასევე შამპანურს მიმოიხილავდა, ხოლო გასულ წელს მის პროფესიულ საქმიანობაში ქართული ღვინოც გამოჩნდა.
ღვინის მაგისტრი ღვინის ინდუსტრიაში 25 წელზე მეტია მოღვაწეობს და ამერიკის ღვინის სექტორის 100 ყველაზე გავლენიან ადამიანს შორის 47-ე ადგილს იკავებს. მისი პროფესიული გამოცდილება და საერთაშორისო აუდიტორიასთან კავშირი ქართული ღვინის ცნობადობის გაზრდისთვის მნიშვნელოვან რესურსს წარმოადგენს.
© ღვინის კლუბი/vinoge.com