გავლენიან ბრიტანულ მედია-გამოცემაში The Buyer გამოქვეყნდა ღვინის მწერალ სანი ჰოჯის სტატია, რომელშიც ავტორი ღვინისა და სპირტიანი სასმელების საერთაშორისო კონკურსის IWSC Georgia 2025-ის შედეგებს აჯამებს.
საქართველოში ჩატარებულმა IWSC-ის მორიგმა კონკურსმა კიდევ ერთხელ ცხადყო, რომ ქვეყანა თანამედროვე ღვინის სამყაროში სულ უფრო ძლიერი და დამაჯერებელი მოთამაშე ხდება. 2025 წელი უკვე მეოთხე შემთხვევა იყო, როდესაც International Wine & Spirit Competition-მა ქართული ღვინოები ადგილზე შეაფასა, და წლევანდელი შედეგები ხარისხის მკვეთრ ზრდასა და მეღვინეობის სტილის თვალსაზრისით გამორჩეულ მრავალფეროვნებაზე მიუთითებს. ორი დღის განმავლობაში გამართულმა კონკურსმა ქართულ ღვინოებს 30 ოქროს, 119 ვერცხლისა და 113 ბრინჯაოს მედალი მოუტანა, ხოლო ქართული სპირტიანი სასმელები დამატებით დაჯილდოვდა ოთხი ოქროს, ექვსი ვერცხლისა და 12 ბრინჯაოს მედლით. აღნიშნული შედეგი ნათლად აჩვენებს, რომ ქართული პროდუქცია უკვე საერთაშორისო სტანდარტებს არა ერთეულად, არამედ სისტემურად აკმაყოფილებს.
ევროპისა და აზიის გზაჯვარედინზე მდებარე საქართველო საუკუნეების განმავლობაში აყალიბებდა ღვინის კულტურას, რომელიც ძველი და ახალი სამყაროს ტრადიციებს აერთიანებს. ქვეყანა ღვინის აკვნად მიიჩნევა და ამას არქეოლოგიური აღმოჩენებიც ადასტურებს. მიუხედავად ასეთი მემკვიდრეობისა, ქართული ღვინო დიდი ხნის განმავლობაში საერთაშორისო ღვინის სიებში შედარებით მცირე როლს თამაშობდა, თუმცა დღეს, როდესაც ქვეყანა სულ უფრო დამოუკიდებელ პოლიტიკურ და ეკონომიკურ გზას ირჩევს, ღვინო ერთ-ერთ მთავარ კულტურულ და საექსპორტო სიმბოლოდ ყალიბდება.
კონკურსს უკვე მეოთხედ ხელმძღვანელობდა სარა აბოტი MW — ქართული ღვინის ერთ-ერთი ყველაზე ძლიერი საერთაშორისო მხარდამჭერი, რომლის მიზანია ქართული მეღვინეობის და გაერთიანებული სამეფოს ღვინის ბაზრის დაახლოება. მისი შეფასებით, საქართველო უნიკალურ რესურსს ფლობს საერთაშორისო დონეზე თავისი პოზიციების გამყარებისთვის.
ქართული ღვინის წარმოების ბირთვი კვლავ კახეთია, სადაც ქვეყნის ვენახების დაახლოებით 70 პროცენტი გვხვდება და სადაც საფერავისა და რქაწითელის ჯიშებია გავრცელებული, რომლებიც ევროპაში ქართული ღვინის სახედ აღიქმება. ამ ღვინოებთან განუყოფლად არის დაკავშირებული ქვევრი — მიწაში ჩაფლული თიხის ჭურჭელი, რომელიც კაცობრიობის ერთ-ერთ უძველეს მეღვინეობის ტექნოლოგიას წარმოადგენს. ქვევრის ფორმა და მიწისქვეშა გარემო ბუნებრივად არეგულირებს დუღილის ტემპერატურას, ხელს უწყობს ექსტრაქციას და უზრუნველყოფს ღვინის სტრუქტურასა და ბალანსს — ყველაფერი ეს შექმნილია საუკუნეების წინ, ბევრად ადრე, ვიდრე დუღილის ბიოლოგიური პროცესები სრულად იქნებოდა გააზრებული.
წლევანდელი კონკურსი ბათუმში გაიმართა, შავი ზღვის სანაპიროზე, ქვეყნის დასავლეთ ნაწილში. დასავლეთ საქართველოში მიღებული მიდგომა, რომლის მიხედვითაც დუღილისას ხშირად მხოლოდ კანის დაახლოებით 30 პროცენტი გამოიყენება, ქმნის უფრო მსუბუქ, ცოცხალ და ნაკლებად ტანინიან ღვინოებს. ეს სტილი მკვეთრად განსხვავდება კახური ინტენსიური ქვევრის ღვინოებისგან და კიდევ ერთხელ უსვამს ხაზს იმას, რომ ქართული მეღვინეობა ერთიან ჩარჩოში არ თავსდება.
ქართული ღვინოები შეაფასა საერთაშორისო დონის ჟიურიმ, რომელშიც შედიოდნენ წამყვანი ბრიტანელი ღვინის მყიდველები, სომელიეები და მედიის წარმომადგენლები, მათ შორის Corney & Barrow-ის, Novel Wines-ისა და Friarwood Wines-ის წამყვანი ფიგურები, ასევე დიდი ბრიტანეთის სომელიეს კონკურსის ფინალისტი. მათ გვერდით მუშაობდნენ ადგილობრივი ექსპერტები — ღვინის ეროვნული სააგენტოს ხელმძღვანელი პირები, აკადემიური სფეროს წარმომადგენლები, საქართველოს საუკეთესო სომელიეები და ა.შ.
IWSC-ის საქართველოს შედეგები ცხადყოფს, რომ ქართული ღვინო დღეს აღარ არის მხოლოდ უძველესი ისტორიის მატარებელი ნიშური პროდუქტი. იგი გარდაიქმნება თანამედროვე, ხარისხზე ორიენტირებულ და სტილურად მრავალფეროვან კატეგორიად, რომელსაც შეუძლია ღირსეული ადგილი დაიკავოს მსოფლიოს წამყვან ღვინის ბაზრებზე. ავტოქტონური ჯიშების სიმდიდრე, ქვევრის ტრადიცია და თანამედროვე ცოდნის ინტეგრაცია ქმნის ძლიერ ნარატივს, რომელიც სულ უფრო მეტად იზიდავს საერთაშორისო პროფესიონალებს და კიდევ ერთხელ ამტკიცებს, რომ საქართველო ღვინის აკვანი არა მხოლოდ წარსულით, არამედ დღევანდელი მიღწევებითაც არის.
© ღვინის კლუბი/vinoge.com