2025 წლის ჟურნალ Decanter-ის ოქტომბრის ნომერში დაიბეჭდა კრის მერსერისა და ემი ვისლოკის სტატია, რომელიც ბრიტანეთში ვენახისა და მოსავლის დაცვის ახალ მიდგომებს შეეხება.
როდესაც 2025 წლის რთვლის პერიოდი მოახლოვდა, აღმოსავლეთ სასექსში მდებარე Rathfinny Wine Estate-მა სრულიად ინოვაციური მიდგომა შეარჩია ვენახის დასაცავად. ტრადიციული პლასტმასის ბადეების ნაცვლად, ღვინის მეურნეობამ ცაში მტაცებელი ფრინველები – შევარდნები, ქორები და ჩილეს ლურჯი არწივი – გაუშვა, რათა ვენახები დაეცვა მავნე ფრინველებისგან, როგორიცაა თოლიები, მტრედები და ყვავები.
ფრინველთა პატრულირება სექტემბრის განმავლობაში განხორციელდა სპეციალისტი ფალკონერების გუნდის მიერ. სხვადასხვა ზომისა და შესაძლებლობების მქონე ფრინველები დღის განმავლობაში – განთიადიდან მზის ჩასვლამდე – რეგულარულად დაფრინავდნენ ვენახების თავზე. ეს იყო გარემოზე ნაკლებად მოქმედი მეთოდი, რომლის მიზანი მტაცებლისა და მსხვერპლის ბუნებრივი დინამიკის გამოყენება იყო: მტაცებელი ფრინველების ერთი გამოჩენაც კი საკმარისი აღმოჩნდა იმისთვის, რომ მავნე ფრინველები შეშინებულიყვნენ და ტერიტორიას გასცლოდნენ.
სარა დრაივერი, Rathfinny-ის თანადამფუძნებელი და მფლობელი, ამბობს:
„წლების განმავლობაში ვენახს პლასტმასის ბადეებით ვიცავდით, თუმცა როგორც B Corp-სერტიფიცირებული კომპანია, ჩვენ მუდმივად ვეძებთ გზებს, რომ გარემოზე ჩვენი ზემოქმედება შევამციროთ. ბადეები დაახლოებით სამიდან ხუთ წლამდე ძლებს და საჭიროებს ათასობით პატარა პლასტმასას, რათა ადგილზეც მყარად იყოს დამაგრებული.“
მეურნეობის მიერ არჩეული ეკოლოგიური გზა მის ფართო გარემოსდაცვით ხედვას ემთხვევა. გარდა იმისა, რომ მავნე ფრინველები ვენახს შორდებიან, ეს მეთოდი თავიდან გვარიდებს ასობით კილომეტრიანი ბადეების გამოყენებას და, შესაბამისად, პლასტმასის ნარჩენების წარმოქმნას.
მტაცებელ ფრინველთა შორის გამოირჩეოდა შავმკერდიანი არწივი, რომელსაც ჩილეს ლურჯ არწივადაც იცნობენ – თავისი მასშტაბურობითა და გამოხედვით ის ეფექტურად აშინებდა მავნე ფრინველთა ჯგუფებს. სხვადასხვა ჯიშის მტაცებლებს სპეციალური როლები ჰქონდათ – ზოგი ვენახის შუაგულს იცავდა, ზოგიც კი პერიმეტრს აკონტროლებდა.
2025 წელი ბრიტანული მევენახეობისთვის იმედისმომცემი აღმოჩნდა. მევენახეები ქვეყნის მასშტაბით აღნიშნავდნენ მოსავლის ხარისხის ზრდას, რაც გრძელვადიანი, რეკორდულად ცხელი ზაფხულის შედეგია. ვენახებში ყურძნის დამწიფება დაჩქარდა, რის გამოც რთველი ჩვეულზე დაახლოებით 10 დღით ადრე დაიწყო. ასეთ პირობებში მოსავლის დაცვა განსაკუთრებით მნიშვნელოვან ამოცანად იქცა.
მიუხედავად იმისა, რომ პროექტი ჯერ კიდევ საცდელ ეტაპზეა, პირველადი შედეგები დადებითად ფასდება – ვენახში მავნე ფრინველთა აქტივობა მნიშვნელოვნად შემცირდა. Rathfinny იმედოვნებს, რომ ეს მეთოდი შესაძლოა მაგალითად გამოდგეს სხვა მეურნეობებისთვისაც, რომლებიც ცდილობენ შეამცირონ ნარჩენები და ბუნებასთან ჰარმონიულად ითანამშრომლონ.
კლიმატური ცვლილებებისა და მომხმარებელთა მზარდი ეკოლოგიური მოლოდინების ფონზე, ვენახის დაცვა მტაცებელი ფრინველებით შეიძლება იქცეს არა მხოლოდ ინოვაციურ, არამედ საჭირო პრაქტიკად – გზად, რომელიც წარსულის ცოდნას და თანამედროვე ეკოვიზიას აერთიანებს.
© ღვინის კლუბი/vinoge.com