რამდენიმე დღის წინ ვარშავაში ქართული ღვინის დეგუსტაცია Georgian Grand Tasting გაიმართა. ღონისძიება ღვინის ეროვნული სააგენტოსა და პოლონური მარკეტინგული კომპანიის „People PR“-ის ორგანიზებით ჩატარდა და მისი მთავარი მიზანი ქართული ღვინის პოპულარიზაცია და საექსპორტო ბაზრების დივერსიფიკაცია იყო.
დეგუსტაციას პოლონელი ღვინის პროფესიონალები, იმპორტიორები, HoReCa სექტორის წარმომადგენლები და მედიის წევრები დაესწრნენ. ღონისძიების ფარგლებში სტუმრებს შესაძლებლობა ჰქონდათ გაცნობოდნენ ქართული ღვინის მრავალფეროვან ასორტიმენტს და ქართველი მეღვინეების მიერ წარმოებულ სხვადასხვა სახეობის ღვინოებს.
„Georgian Grand Tasting“-ზე საკუთარი პროდუქცია ქართული ღვინის მწარმოებელმა 40 კომპანიამ წარადგინა. მსგავსი ფორმატის ღონისძიებები ქართველი მეწარმეებისთვის მნიშვნელოვან პლატფორმას წარმოადგენს, რადგან მათ საშუალებას აძლევს დაამყარონ საქმიანი ურთიერთობები უცხოელ იმპორტიორებთან და დისტრიბუტორებთან, რაც საერთაშორისო ბაზრებზე გაყიდვების ზრდას უწყობს ხელს.
ღონისძიების ფარგლებში ასევე გაიმართა ქართული ღვინის თემატური მასტერკლასები. მათ ღვინის ეროვნული სააგენტოს სახელმწიფო სადეგუსტაციო კომისიის თავმჯდომარე ანა გოდაბრელიძე, სააგენტოს ღონისძიებების კოორდინატორი ირაკლი ჩოლობარგია და პოლონელი სომელიეები იან კნობერი და სიმონ მილონასი უძღვებოდნენ. მასტერკლასების მონაწილეებს შესაძლებლობა ჰქონდათ უფრო დეტალურად გაცნობოდნენ ქართული მეღვინეობის ისტორიას, ღვინის წარმოების ტრადიციებსა და თანამედროვე ტენდენციებს.
© ღვინის კლუბი/vinoge.com
ბეჭდვა
თქვენი კომენტარი