მსოფლიოს ყველაზე ძვირფასი ღვინოები

ლევან სეფისკვერაძე

ღვინის ფასი ხშირად არამხოლოდ ხარისხზე და გემოზე, არამედ უნიკალურ ისტორიაზე, ასაკზე, წარმოშობის რეგიონზე და იშვიათობაზეა დამოკიდებული. მსოფლიოს მასშტაბით არის ღვინოები, რომლებიც აუქციონებზე ასობით ათას დოლარად იყიდება. ასეთი ღვინოები ბევრისთის უფრო ხელოვნების ნიმუშად მიიჩნევა, ვიდრე ყოველდღიური მოხმარების პროდუქტად.

თუ ღვინო ძალიან მცირე რაოდენობით იწარმოება, ან კონკრეტული მოსავალი უკვე აღარ არსებობს, მისი ფასი მკვეთრად იზრდება. ძველი ბოთლები, რომლებიც ცნობილ პიროვნებებს ეკუთვნოდათ (მაგალითად, ჯეფერსონის კოლექცია), განსაკუთრებულად ძვირი ღირს. ამას გარდა ძალიან იმატებს ისეთი ღვინოების ფასები, რომლებსაც ცნობილი კრიტიკოსები მაღალ შეფასებებს აძლევენ. ბევრი კოლექციონერი ღვინოს საერთოდ არ სვამს და ინახავს, როგორც ხელოვნების ნიმუშს.

ქვემოთ განვიხილავთ მსოფლიოს ყველაზე ძვირ ღვინოებს, მათ წარმომავლობას, ფასების მიზეზებსა და იმ გარემოებებს, რამაც ისინი ღვინის ინდუსტრიის ლეგენდებად აქცია.

ლეგენდარული Domaine de la Romanée-Conti საფრანგეთში, ბურგუნდიაშია დაყენებული. ბურგუნდიაში მდებარე ეს პატარა ვენახი დღეს მსოფლიოში ყველაზე პრესტიჟული და ძვირადღირებული ღვინის მწარმოებელია. ერთი ბოთლი ხშირად 20 000-40 000 დოლარი და უფრო მეტი ღირს, ხოლო გამორჩეულ წლებში (განსაკუთრებით 1945 წლის მოსავალი) აუქციონებზე ნახევარ მილიონ დოლარსაც აღწევს. ამ ღვინის სიძვირის მთავარი მიზეზი იშვიათობაა, Romanée-Conti-ს მიკროზონაში მოწეული პინო ნუარის ვენახი მხოლოდ 1,8 ჰექტარზეა გაშენებული.

Château Margaux ბორდოს რეგიონის უნიკალური შატოს სახელია, რომლის ისტორია XVII საუკუნიდან იწყება. ამ მცირე საოჯახო წარმოების ღვინოებიდან ყველაზე ცნობილი არის Château Margaux 1787, რომელიც აუქციონზე 225 000 დოლარად გაიყიდა. ამბობენ, რომ ეს ბოთლი ამერიკის პრეზიდენტმა თომას ჯეფერსონმა საიდუმლოდ შეიძინა.

ასევე ბორდოში მდებარეობს Château Lafite Rothschild. ამ ერთ-ერთი ყველაზე ძველი და გავლენიანი შატოს 1787 წლის მოსავლის პინო ნუარის ბოთლი, რომელიც ასევე ჯეფერსონის კოლექციაში აღმოჩნდა, 2015 წელს 156 000 დოლარად გაიყიდა. ეს შატო ასევე ცნობილია ახალი  მოსავლების ღვინოების მაღალი ფასებითაც.

ამერიკულ ღვინის ბაზარზე ყველაზე ძვირად გაყიდული ღვინო კალიფორნიული Screaming Eagle Cabernet Sauvignon 1992 გახლავთ. ამ ღვინის სპეციალური ჩამოსხმის 6-ლიტრიანი ბოთლი საქველმოქმედო აუქციონზე 500 000 დოლარად გაიყიდა. ეს ღვინო კაბერნე სოვინიონისგანაა დამზადებული და დღესაც ერთ-ერთი ყველაზე იშვიათ, კოლექციონერებისთვის სასურველ კალიფორნიულ ნიმუშად ითვლება.

Cheval Blanc 1947 Saint-Émilion ჭეშმარიტად ლეგენდარული ღვინოა, რომელიც ღვინის კრიტიკოსების მიერ „საუკუნის საუკეთესო ბორდოდ“ არის აღიარებული. 2022 წელს ბოთლი 304 000 დოლარად გაიყიდა. ეს ღვინო დღემდე აღიარებულია, როგორც უნიკალური არომატებისა და სრულყოფილი სტრუქტურის მაგალითი.

ავსტრალიის ყველაზე ძვირადღირებული ღვინო Penfolds Grange Hermitage 1951 გახლავთ, რომლის  მხოლოდ 20 ბოთლია შემორჩენილი, თითოეულის ღირებულება 40 000-50 000 დოლარს აღწევს.

ბოლო 20 წლის განმავლობაში, ელიტარული ღვინოების ღირებულება საშუალოდ 250-300%-ით გაიზარდა. ინვესტორებისთვის ღვინო უსაფრთხო აქტივად ითვლება, განსაკუთრებით მაშინ, როდესაც ბოთლი ისტორიულ და იშვიათ კატეგორიას მიეკუთვნება.

მსოფლიოს ყველაზე ძვირი ღვინოები, ძირითადად, აუქციონებზე იყიდება. ღვინის აუქციონები კოლექციონერებს საშუალებას აძლევს, შეიძინონ იშვიათი ბოთლები, რომელთა ფასიც ხშირად ბევრად აღემატება საწყის ღირებულებას. ასევე მნიშვნელოვანია კერძო კოლექციები, სადაც ღვინო ათწლეულებით ინახება და შემდეგ რეკორდულ ფასად გადადის სხვა მფლობელის ხელში. ზოგიერთი ღვინო კი მხოლოდ მუზეუმებში ან კერძო სარდაფებში ინახება და პრაქტიკულად არასდროს იხსნება.

© ღვინის კლუბი/vinoge.com