პოლონეთში, კრაკოვში The International Wine Trade Fair - ENOEXPO ღვინის ყველაზე ფართომასშტაბიანი და მნიშვნელოვანი ღონისძიებაა. აქ იმპორტიორები, დისტრიბუტორები, ღვინის ექსპერტები და მწარმოებლები მთელი მსოფლიოდან ერთმანეთს ხვდებიან. ნაკლებად ცნობილი ღვინის მარნებისთვის ეს გამოფენა განსაკუთრებით მნიშვნელოვანია, რადგან მათ შესაძლებლობა ეძლევათ უცხოელ იმპორტიორებსა და ექსპერტებს თავიანთი პროდუქცია გაასინჯონ და მსოფლიო ღვინის ბაზარზე ადგილის დამკვიდრება შეძლონ.
ღონისძიებაზე სხვადასხვა შეხვედრებსა და სემინარებს ENOEXPO Wine Academy-ს ექსპერტები ხელმძღვანელობდნენ. გამოფენაზე მეწარმეებს სხვადასხვა სტილისა და კატეგორიის ღვინოების წარდგენის გარდა კონკურსში მონაწილეობის მიღებაც შეეძლოთ, რაც ღონისძების მნიშვნელოვანი უპირატესობაა.
ღონისძიებას, რომელიც 16-18 ნოემბერს გაიმართა 7300-მდე სტუმარი დაესწრო. მონაწილეობა მიიღო 111-მა მარანმა 13 ქვეყნიდან. გამოფენაში 24 ქართულმა ღვინის მწარმოებელი კომპანია მონაწილეობდა. კონკურსში კი მთლიანობაში ქართულმა ღვინოებმა 8 ჯილდო მოიპოვა, ერთი ოქრო, 4 ვერცხლი და 3 ბრინჯაო. ოქროს მედალი დაიმსახურა “თელავის ღვინის მარნის” 2020 წლის ბიო საფერავმა.
ვერცხლის მფლობელი ღვინოებია:
რქაწითელი, “შატო ნაფარეული”
რქაწითელი ქვევრი, “ასკანელი”, 2019
საფერავი, “მარანი ელიზბარი 1918”, 2019
მარანი ბრუტი, “თელავის ღვინის მარანი”, 2019
ბრინჯაო:
მწვანე ქისი, “მარანი ელიზბარი 1918”, 2019
სატრაპეზო ქვევრი, “თელავის ღვინის მარანი”, 2019
მუკუზანი პრემიუმი, “ასკანელი”, 2019
გუჯა ნატროშვილი, “ელიზბარი 1918-ის” ხელმძღვანელი აღნიშნავს, რომ მსგავსი ტიპის ღონისძიებები ძალიან მნიშვნელოვანია მარნის პოპულარიზაციისა და წარმატებისთვის: “ჩვენ ღვინოები გაგვქონდა და დღემდე გაგვაქვს ვარშავაში, ქართულ რესტორან “რუსიკოში”, რომელიც ძალიან პოპულარულია იქ, ვთანამშრომლობთ სხვა კომპანიებთანაც. რაც საწარმო გავხსენით, ძირითადად ფესტივალებზე არ დავდივართ ხოლმე, რადგან არ გვაქვს ბევრი სტილისა და კატეგორიის ღვინო, თუმცა Enoexpoze უკვე რამდენჯერმე მოვახერხეთ გამარჯვება. ჯილდო კი, ბუნებრივია, წამახალისებელია იმისა, რომ კიდევ უფრო მეტი და სხვადასხვა სტილის ღვინო დავწუროთ. ჩვენთვის, პირველ რიგში, ეს გამოფენა ისევ და ისევ ჩვენი მარნისა და ღვინოების ცნობადობის ამაღლებას და პოპულარიზაციას ემსახურება, რაც, რა თქმა უნდა, ძალიან მნიშვნელოვანია.” - აღნიშნავს გუჯა.
Enoexpo კრაკოვში 16-18 ნოემბერს გაიმართა. 13-მა ქვეყანამ მთლიანობაში 22 მედალი დაიმსახურა, რომელთაგან 8 ჯილდო საქართველომ აიღო, ეს კი, ჩვენი, ქართული ღვინოების მსოფლიო ბაზარზე ადგილის დამკვიდრებას უწყობს ხელს. დეტალურ ინფორმაციას გამოფენის შესახებ გაეცნობით Enoexpo-ს ვებ. გვერდზე.
© ღვინის კლუბი/vinoge.com