- როდის გადაწყვიტეთ მარნის დაარსება და რა იყო ამის მიზეზი?
- მარნის დაარსება გადავწყვიტეთ 2014 წლის ახალი ღვინის ფესტივალიდან დაბრუნების შემდეგ, ამისათვის უღრმესი მადლობა მის ორგანიზატორებს და ღვინის კლუბს. ჩვენი პაპა, სიმონ ავქოფაშვილი, შემდეგ მამაჩვენი ვაჟა ავქოფაშვილი, 60 წლის განმავლობაში აყენებდნენ ოჯახურ ნატურალურ ღვინოს სოფელ რატევნის რქაწითელის ჯიშის ყურძნისგან, კასრებში. მე და ჩემმა ძმამ, გიორგიმ გადავწყვიტეთ ეს ტრადიცია გაგვეგრძელებინა, ოღონდ ღვინის დაყენება გადავწყვიტეთ ქართული ტრადიციული წესით, ქვევრებში. 2015 წელს დავაფუძნეთ პატარა საოჯახო მარანი და ჩავდგით 1200 ლიტრიანი და 1500 ლიტრიანი ზურა კაპანაძის შექმნილი ქვევრები, რომელიც ზურაბ თოფურიძემ გვირჩია, მადლობა მას! 2016 წლის ექსპო–ჯორჯიას მიერ ორგანიზებულ საერთაშორისო გამოფენა-კონკურსზე ამ ქვევრებში დაყენებულმა რქაწითელის ღვინომ პირველი ჯილდო, ვერცხლი მოიპოვა.
- ვაზის რომელი ჯიშები გაქვთ გაშენებული და კიდევ რომელ ჯიშებზე აპირებთ ყურადღების გამახვილებას?
- ჩვენ გვაქვს პატარა ვენახი სოფ. რატევანში, ბოლნისის რაიონში. ვენახი განვაახლეთ, ჩავყარეთ ვაზი ჩინებული, იაგოს მივბაძეთ, ასევე გვაქვს ცოლიკოური. რატევნის ვენახი იქნება ბიო. გვაქვს ასევე პატარა ვენახი სოფ. ხატისოფელში, სადაც რქაწითელია გაშენებული. სოფ. რატევანი და სოფ. ხატისოფელი ტრადიციით, კლიმატური და ნიადაგური პირობებით, ბოლნისის რაიონის სხვა სოფლებთან ერთად (ტალავერი, არქევანი, რაჭისუბანი) ძალზე საინტერესო მიკროზონებია, რომელსაც სასურველია ოფიციალურადაც მიენიჭოს ადგილწარმოშობის სტატუსი. ვაპირებთ თავკვერის ჯიშის ვაზის გაშენებას რქაწითელთან ერთად. ბოლნური თავკვერის ღვინო საოცრება გამოდის.
- რა ღვინოებს აწარმოებთ და რითაა გამორჩეული თქვენი ღვინო?
- ძმების მარნის ქვევრის ღვინო რქაწითელი არის ხალისიანი, ჰარმონიული, იგრძნობა ვაშლისა და გარგრის ჩირის ტონები, ზომიერად ტანინიანია. ალკოჰოლის შემცველობა 12,5.
- გაიხსენეთ საქართველოში ღვინის გაყიდვის თქვენი პირველი გამოცდილება. რომელ მაღაზიებთან გქონდათ გქონდათ ურთიერთობა?
- ძმების მარნის ქვევრის ღვინო რქაწითელი პირველად 2016 წელს მოხვდა ღვინის
მაღაზიებში. ესენია: ვინომანია (თბილისი, ბათუმი), ღვინის ოთახი (თბილისი, ბათუმი), როიალ ვაინ, რესტორანი მაიდანი, გრინ ინვესტი, ბათუმი.
- გადის თუ არა თქვენი ღვინო უცხოეთის ბაზარზე?
- 2016 წელს ჩვენი მარანი გაიზარდა. უცხოეთის ბაზარზე ღვინის შეტანას ვგეგმავთ 2017 წლისთვის, გვექნება ქვევრის ბოლნური რქაწითელი, საფერავი, თავკვერი, როზე (რქაწითელი,თავკვერი).
- რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
- არჩილ გუნიავას აზრს ვიზიარებთ, რომ გადაულახავი სირთულეები ამ დროისთვის არ ჩანს. ჩვენი რეგიონისთვის, კონკრეტულად კი ბოლნისის რაიონისთვის და ოჯახური მარნების განვითარებისთვის სასიცოცხლოდ მნიშვნელოვანია ადგილწარმოშობის დასახელება გაჩნდეს ჩვენთან, რისი ყველა პირობაც არსებობს. ასევე აუცილებელია მკაცრად გაკონტროლდეს ღვინის ხარისხი. ადგილობრივი ხელისუფლებების დონეზე საჭიროა ხელი შეეწყოს, წახალისდეს ოჯახური ქვევრის ღვინოების წარმოება, სადაც ამის პოტენციალია. ღვინის კლუბს უდიდესი წვლილი აქვს ამ დარგის განვითარებაში.
- თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებისთვის?
- პირველ რიგში მნიშვნელოვანია ყველა ქართველმა მიირთვას, მოითხოვოს, შეიძინოს, დააყენოს ხარისხიანი ქართული ღვინო. დანარჩენს ყველაფერს მოევლება. საჭიროა მეტი ინფორმირებულობა.
- რას ურჩევდით დამწყებ მევენახე-მეღვინეებს?
- ჩვენც დამწყები მევენახე მეღვინეები ვართ. მთავარია მოთმინება, სწავლა, გამოცდილ მეღვინეებთან კონტაქტები, მათთვის რჩევების კითხვა, მათი გამოცდილების გაზიარება.
საკონტაქტო ინფორმაცია:
"ძმების მარანი"
მისამართი: ქ.ბოლნისი, ჭავჭავაძის 97.
ტელეფონი: +995 551751711, +995 577770489 გურამი.
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი