ელენე ბუხაიძის ფოტო
ჟურნალი დეკანტერი, 40 წლის იუბილესთან დაკავშირებით, საკუთარი თანამშრომლებისა და ავტორების წლის ფავორიტი ღვინოების ჩამონათვალს აქვეყნებს.
ავტორთა შორისაა გასტრონომიის, ღვინისა და მოგზაურობის მწერალი, ფოტოგრაფი - კარლა კაპალბო, რომელმაც საქართველოში სულ ახლახანს, უკვე მესამედ, იმოგზაურა. კაპალბო მსოფლიოს საუკეთესო ღვინოებს შორის ნიკოლაძეების მარანის ცოლიკოურს (ცოლიკოური 2013, ნახშირღელე, იმერეთი) ასახელებს.
„მომწონს ის ღვინოები, რომლებიც სტატუს კვოს შესახებ კითხვებს აღძრავს. ეს მშვენიერი ქარვისფრად შეფერილი თეთრი ღვინო, როგორც ბევრი სხვა, საუკეთესო ქართული ღვინო, დაყენებულია ქვევრში (ტრადიციული დიდი ზომის თიხის ჭურჭელი, რომელიც დარგულია მიწაში). რამაზ ნიკოლაძე აწარმოებს მას საქართველოს ცენტრალურ ნაწილში, იმერეთის მთებში, ცოლიკოურის ასწლოვანი ვაზისგან, ჭაჭაზე სამთვიანი დავარგებით, კლერტის გარეშე. სანელებლების, გარგრისა და ჩაის ეგზოტიკური ნოტები ღვინოში ამაღელვებელი ენერგიით გაგიძღვებათ ტანინებიანი, დახვეწილი დაბოლოებისკენ. ეს ღვინო საოცრად მიდის საკვებზე.“ - წერს კაპალბო.
შეგახსენებთ, რომ რამაზ ნიკოლაძის ცოლიკოური 2015 წლის ივლისში independent-ის რჩეული ნარინჯისფერი ღვინოების ათეულში მოხვდა.
© საქართველოს ღვინის კლუბი, ღვინის საინფორმაციო ცენტრი.