უკვე არაერთხელ აღგვინიშნავს, რომ თავკვერის ჯიში ერთ-ერთი საუკეთესოა ახალგაზრდა ღვინოებისთვის, ისეთი ღვინოებისთვის, რომელიც პირველივე წელსაა ყველაზე გემრიელი. ეს ღვინო დარსაველიძეების მარანშია დაყენებული, მარნეულის რაიონის სოფელ თამარისში. ვენახი ბიოპრეპარატებითაა მოვლილი, ღვინო კი ნატურალური მეთოდებითაა დაყენებული. ძალზე ხალასი გარეგნობით ხასიათდება, ჟოლოსფერია, პირველ სურნელებში კი ჩაჭყლეტილი ღოღნაშოსა და მწიფე წითელი ტყემლის ტონებს იგრძნობთ, რომელსაც გემოზე კენკრისა და მცენარეული ტონები ავსებს. საკმაოდ ხანგრძლივი დაბოლოება აქვს და გამორჩეულად ე.წ. გასტრონომიული ღვინოა. ბევრ კერძს შეიხამებს კარგად.
© ღვინის კლუბი /Weekend