იუნესკოს არამატერიალური კულტურული მემკვიდრეობის დაცვის მთავრობათაშორისი კომიტეტის მე-8 სესიაზე ქვევრის ღვინის დაყენების უძველეს ქართულ ტრადიციულ მეთოდს კულტურული მემკვიდრეობის ძეგლის სტატუსი მიენიჭა. სწორედ ამ ისტორიულ ფაქტთან დაკავშირებით „ღვინის კლუბი“ აწყობს საზეიმო მიღებას.
მიღება გაიმართება 17 დეკემბერს, საღამოს 19:00–ზე, საქართველოს ეროვნული ბიბლიოთეკის 3–ე კორპუსში, დიდ საგამოფენო დარბაზში. მიღებას დაესწრებიან: კულტურისა და ძეგლთა დაცვის სამინისტროს, ღვინის ეროვნული სააგენტოს, ქვევრის ფონდის, ასოციაცია „ქართული ღვინის“, ასოციაცია „ქვევრის ღვინის“ და სხვა ორგანიზაციების წარმომადგენლები. სიტყვით გამოვლენ ქართული ღვინის პოპულარიზაციის საქმეში აქტიურად ჩართული სპეციალისტები, მექვევრეები, მეღვინეები, ღვინის მოყვარულები.
ქართველი ქვევრის ღვინის მწარმოებლები წარმოგვიდგენენ თავიანთ ღვინოებს საქართველოს მევენახეობა–მეღვინეობის სხვადასხვა კუთხიდან.
ერთად აღვნიშნოთ ქართული ღვინის დიდი გამარჯვება.