პოლონეთში, კარპატისპირეთში გაშენებული 70-მდე მარანი მზად არის დამთვალიერებელი მიიღოს, თუმცა სულ რაღაც ორი წლის წინ მხოლოდ 10-მდე მარანს თუ შეეძლო ტურისტების მასპინძლობა. პოლონეთში ენოტურიზმი სწრაფი ტემპით ვითარდება და ადგილობრივი მარნების გასაცნობად ყოველწლიურად უფრო და უფრო მეტი ტურისტი ჩამოდის. მასპინძლები სტუმრებს ძირითადად თავიანთი მარნების დათვალიერებას, ყურძნისა და ღვინის შესახებ საინტერესო ინფორმაციის მოსმენას და სასმელის დაგემოვნებას სთავაზობენ. მსურველებს შეუძლიათ ადგილზევე მიირთვან გემრიელი ვახშამი და ღამეც ვენახით გარშემორტყმულ სასტუმროში გაათიონ. დღეს ამ მხარეში დაახლოებით 150-მდე ღვინის საწარმო ფუნქციონირებს და ძირითადად რამდენიმე ჯიშის ყურძენი მოჰყავთ: Seyval Blanc, Marechal Foch და Leon Millot. მევენახეობა და მეღვინეობა სამხრეთ პოლონეთში X-XI საუკუნეში აღმოცენდა. თუმცა, XVI-XVII საუკუნეებში პოლონურმა ღვინომ უნგრულს კონკურენცია ვერ გაუწია და ამ დარგის განვითარება შეფერხდა. კარპატების მთისწინეთის ზოლში მეღვინეობა მხოლოდ გასული საუკუნის 80-იან წლებში აღორძინდა.
© ღვინის კლუბი/Weekend