მდიდრებს ლხინისთვის მიზეზი არ სჭირდებათ: თუ ჯიბე საშუალებას გაძლევს, ზეიმი შეიძლება უმიზეზოდაც გამართო და მილიონობით დოლარი მხოლოდ ელიტური შამპანურის საყიდლად დახარჯო – ასეთ ძვირფას სასმელს კი ჩასაცივებლად ჭურჭელიც შესაფერისი უნდა შეურჩიო. სწორედ ოლიგარქთა გემოვნებისა და მოთხოვნების გათვალისწინებით, რამდენიმე კილოგრამი ოქროსგან ჩამოასხეს შამპანურის ჩასაცივებლად განკუთვნილი, ყინულის ჩასაყრელი ვედრო. ამ იუველირული ჭურჭლის შემქმნელი დიზაინერი ვან პერკინსი გახლავთ. შამპანურის ვედროს დასამზადებლად მან 7 კილოგრამი 20-კარატიანი ოქრო, ბროლი და ძვირფასი თვლები გამოიყენა, ამიტომ ფასიც შესაბამისი აქვს – 724 460 აშშ დოლარი ღირს. ჭურჭელი დახვეწილი დიზაინით გამოირჩევა და შეფუთვაც განსაკუთრებული აქვს - დევს ვარდის ხისგან დამზადებულ კოლოფში, რომელიც მოოქროვილი დეტალებით არის შემკული. ფუტლიარს აქვს უჯრა, რომელშიც შამპანურის 6 ბოკალი დევს. გარდა ამისა, ნაკრებს წყვილი შავი ხელთათმანიც მოჰყვება. პერკინსის ჭურჭელი სხვადასხვა სახით შეიძლება შეგხვდეთ - მაგალითად, მთლიანად ოქროს, ან ოქროსა და ვერცხლისგან დამზადებული, გააჩნია, რა სურს დამკვეთს. თითოეულ ასეთ ვედროს ხარისხის დამადასტურებელი სერთიფიკატი გააჩნია, ფასი კი გამოყენებული მასალისა და შესრულების ოსტატობის დონის მიხედვით განისაზღვრება.
© ღვინის კლუბი/Weekend
