ეგვიპტეში, ქაიროს სამხრეთით მდებარე ერთ-ერთ დაბაში გამართული დემონსტრაციის მსვლელობისას, რომლის მონაწილეებიც ალკოჰოლის რეალიზაციის აკრძალვას მოითხოვდნენ, ერთი ადამიანი დაიღუპა, რვამ კი სხეულის დაზიანება მიიღო. მუსლიმანი დემონსტრანტები ისლამის კანონების თანახმად ცხოვრებას ემხრობიან და, შესაბამისად, ალკოჰოლური სასმელების როგორც მოხმარების, ისე რეალიზების წინააღმდეგ გამოდიან.
ექსპერტების დაკვირვებით, მას შემდეგ, რაც ეგვიპტეში მომხდარი მასობრივი გამოსვლების შედეგად პრეზიდენტი მუბარაქი გადადგა, ქვეყანაში აშკარად გააქტიურდნენ ისლამური კანონების – შარიათის ამოქმედების მომხრენი. 13 თებერვლიდან მოყოლებული, მას შემდეგ, რაც ქვეყნის მართვის სადავეები სამხედრო ხელისუფლების ხელში გადავიდა, ქვეყნის კონსტიტუციის მოქმედება შეჩერებულია. ახალი ხელისუფლება რეფერენდუმის ჩატარებას და კონსტიტუციაში ცვლილებების ამგვარად შეტანას გეგმავს.
© ღვინის კლუბი/Weekend