პერიოდულად აუქციონზე გასაყიდად გამოაქვთ ხოლმე სპირტიანი სასმელები, რომლებიც არა მხოლოდ ასაკით, არამედ შესაბამისი ფასითაც იწონებენ თავს. ამჯერად ყურადღებას იპყრობს მორიგი იშვიათი ლოტი - ალუბლის ექსკლუზიური ლიქიორი Cherry Heering,არაჩვეულებრივი სასმელი 120 წლიანი დაძველებითა და შესანიშნავი გემოთი.
1890 წლის იშვიათი ლიქიორის რამდენიმე ბოთლი დანიაში, Heering-ის სარდაფში აღმოაჩინეს, სადაც მას 1818 წლიდან უშვებდნენ. ლიქიორები შესანიშნავადაა შენახული. ისინი ხელითაა შეფუთული და აწყვია ხის ყუთებში, რომლებზეც სამეფო გერბია ამოტვიფრული - ამ სასმელით ხომ რუსეთის იმპერატორისა და დანიის სამეფო კარს ამარაგებდნენ. სასმელის ხარისხის შესაფასებლად 2010 წლის მაისში, ნიუ-იორკში ჩატარდა დეგუსტაცია, რომელშიც მონაწილეობდნენ ღვინის წამყვანი ექსპერტები. მათ დაადასტურეს, რომ ლიქიორი შესანიშნავადაა შენახული და აქვს თამბაქოსა და შოკოლადის ღრმა, გამოხატული გემო.
6 დეკემბერს, ნაშუადღევს, ამ იშვიათი სასმელის ერთი ბოთლი ინტერნეტ-აუქციონზე, საღამოს კი Sotheby's ნიუ-იორკის ფილიალში იქნა გამოტანილი. ლიქიორის ზუსტი ფასი ჯერჯერობით ცნობილი არაა, თუმცაღა, წინასწარი შეფასებით, მისი ღირებულება დაახლოებით 100 ათას დოლარს შეადგენს. აუქციონზე შემოსული თანხა ქველმოქმედებას მოხმარდება.
© ღვინის კლუბი/Weekend