ლიკა ჯობაძე
შვედეთის ხელისუფლებამ აუქციონზე გასაყიდად ალკოჰოლის მწარმოებელი კომპანია Vin & Sprit-ი გაიტანა. ის ისეთი ცნობილი ბრენდის მწარმოებელია, როგორიც გახლავთ Absolut-ი. გაყიდვების მაჩვენებლით შვედური ბრენდი მსოფლიოში მეოთხე ადგილზეა. ანალიტიკოსებმა კორპორაციის აქტივები 5,7 მილიარდ დოლარად შეაფასეს. ახლა კი, აუქციონის წყალობით, ეს ფასი შესაძლოა 6-7 მილიარდ დოლარამდე გაიზარდოს. კომპანია Vin&Sprit-ის მყიდველთა პრეტენდენტებს შორის მსოფლიოში ალკოჰოლის ინდუსტრიის გრანდები - Pernod Ricard-ი და Bacardi International-ია.
ამჟამად ბრენდი Absolut-ი, კონკურენტ Smirnoff -ის შემდეგ, პოპულარულობით მეორე ადგილზეა, გაყიდვების მაჩვენებლით კი მეოთხეზე. მისი კაპიტალიზაცია 5,7 მილიარდი დოლარია. მიუხედავად ამისა, შვედეთის ხელისუფლებას აუქციონის მეშვეობით მისი ფასის 6-7 მილიარდამდე გაზრდა სურს. თუ ეს ჩანაფიქრი ასრულდება, მაშინ Vin & Sprit-ის გაყიდვა შვედეთში ყველაზე დიდი პრივატიზაცია იქნება.
ალკოჰოლური კომპანიის გაყიდვა "სახელმწიფო აქტივების გაყიდვის” სტრატეგიის ნაწილია, რომელიც შვედეთის ხელისუფლებამ გასულ წელს შეიმუშავა. აღნიშნული სტრატეგიით, ხელისუფლება 200 მილიარდ შვედურ კრონს მოიზიდავს. ქვეყნის ფინანსური ბაზრების მინისტრ მატსა ოდელლიას განმარტებით, ეს პროცესი 2008 წლის ბოლომდე გასტანს.
კომპანია Vin & Sprit-ის გარდა, შვედეთის ხელისუფლება აუქციონზე ხუთ სახელმწიფო და ნახევრადსახელმწიფო კომპანიის აქციების 100%-იან პაკეტს გაიტანს. მათ შორის არის იპოთეკური კომპანია SBAB-ი, ბირჟის ოპერატორი OMX-ი და უძრავი ქონების სააგენტო Vasakronan-ი.
მინისტრის თქმით, ობიექტების გაყიდვის პროცესში მხოლოდ მყიდველთა მიერ შეთავაზებული წინადადებები არ იქნება საკმარისი. "ჩვენ მონაწილეთა საერთო შეფასებას ვაკეთებთ, სადაც ფასი ერთ-ერთი განმსაზღვრელი ფაქტორი იქნება,” - აღნიშნა მატს ოდელიამ. მისივე თქმით, Absolut-ის გაყიდვის შემდეგ, წარმოება შვედეთში დარჩება.
კომპანია Vin & Sprit-ი სამი ნაწილისგან შედგება, აქედან ერთ-ერთი V&S Absolut-ია, რომელიც ბრენდის წარმოებითა და მარკეტინგით არის დაკავებული. ამ განყოფილებაზე Vin & Sprit-ის შემოსავლების დაახლოებით 85% მოდის. 2006 წელს კომპანია Vin & Sprit-მა მსოფლიოში 5,88 მილიარდი კრონის (640 მლნ ევრო) ღირებულების Absolut-ის პროდუქცია გაყიდა.
მატს ოდელია ირწმუნება, რომ კომპანია გაყიდვის შემთხვევაში არ დანაწევრდება. "ჩვენმა ანალიზმა ცხადყო, რომ კომპანიის ერთიანად გაყიდვა ბევრად უფრო საზრიანი და მომგებიანი ნაბიჯია”. გარიგების საკონსულტაციო საქმეს Morgan Stanley-ი წარმართავს.
დაარსების დღიდან - 1917 წლიდან Vin & Sprit-ი შვედეთის სახელმწიფო პოლიტიკასთან იყო კავშირში, რაც იმაში გამოიხატებოდა, რომ ისინი ალკოჰოლის ბაზარზე მონოპოლიას აკონტროლებდნენ.
ამჟამად Absolut-ი Smirnoff-ის შემდეგ მსოფლიოში ყველაზე პოპულარული ალკოჰოლური პროდუქციაა. მისი შესყიდვის სურვილი ალკოჰოლის წამყვანმა მწარმოებლებმა Pernod Ricard-მა, Diageo-მ და Fortune Brands-მა გამოთქვა.
წლის დასაწყისში, რომის უმსხვილესმა მწარმოებელმა კომპანია Bacardi-მ Vin & Sprit-ის ყიდვის შესახებ განაცხადა. კომპანია Bacardi-ის გენერალურმა დირექტორმა ანდრეას ჰემბლერმა შვედეთის ხელისუფლებას შესაბამისი მიმართვა გაუგზავნა. ჰემბლერი ერთ-ერთ ინტერვიუში აცხადებს, რომ Vin & Sprit - Absolut-ი და Bacardi-ი ერთმანეთს ძალიან უხდება. "ასეთი ხარისხიანი ბრენდები მსოფლიოში ძალიან ცოტა დარჩა. ასე რომ, გაერთიანება, ვფიქრობ, კარგი ნაბიჯია ორივე მხრისთვის. Vin & Sprit Absolut-ი ჩვენთვის ძვირფასი შენაძენი იქნება,” - აღნიშნა გენერალურმა დირექტორმა.
ანალიტიკოსები კი ფიქრობენ, რომ Absolut-ის გაყიდვა ალკოჰოლის მსოფლიო ბაზრისთვის მნიშვნელოვანი სიახლეა.
© „მარანი“